O BNG presenta en Barreiros a Ana Ermida como candidata para as eleccións municipais de 2019

Barreiros, 22 de xullo de 2018. Máis de 150 persoas acudiron a unha cita especial da ManiFesta da Patria Galega en Barreiros que, na súa XIV edición, ademais do tradicional xantar a base de bonito; foi aproveitada para presentar publicamente a persoa que encabezará a lista do BNG nas eleccións do vindeiro ano.
Rodeada por un nutrido grupo de veciñas e veciños e acompañada polo actual grupo municipal, outros cargos comarcais e locais do BNG e a deputada no Parlamento galego, Olalla Rodil; Ana Ermida foi presentada como candidata á alcaldía de Barreiros para as eleccións municipais do 2019. Convértese así na primeira candidata confirmada non só en Barreiros, senón en toda a comarca, nun xesto que aseguran que é “a confirmación da boa situación do BNG en Barreiros”.
“A falta de practicamente un ano para as eleccións, o BNG en Barreiros do que está preocupado é de atopar as mellores propostas e de elaborar un programa co que poder traballar desde o goberno municipal para volver a poñer ao noso Concello no lugar que corresponde. O noso propósito é rematar con esta etapa de descontrol e incapacidade por parte do goberno municipal e, por iso, a nosa preocupación non son as persoas que van ocupar tal posto ou tal outro nunha lista electoral”, afirmou Ana Ermida.
Segundo Ermida, “o Bloque en Barreiros ten un proxecto solvente e conta con persoas capaces e dispostas a levalo a cabo; por iso non temos que darlle voltas aos nomes. A nosa será unha candidatura seria, avalada por un programa e unhas ideas coas que pretendemos un cambio en Barreiros que permita que as veciñas e veciños volvan a amosar orgullo ao dicir de onde somos.”
“Queremos que en Barreiros tamén se abra un tempo de esperanza, que ocupe espazos positivos e que se fale do noso Concello por ter iniciativas, propostas, boas novas. Queremos converter Barreiros noutro Ribadeo, Muras, Allariz ou Pontevedra. Que a xente saiba que hai un proxecto de Concello e que somos quen de levalo adiante.”
Presentación da Xanela, o voceiro municipal.
A formación nacionalista aproveitou tamén a cita para distribuír os primeiros exemplares do novo número do seu voceiro, A Xanela. Nesta edición, seguindo o formato da anterior, utilizan as súas páxinas centrais para facer un seguimento do traballo e a situación existente no ámbito municipal, que centra a totalidade do contido da mesma. Recolle tamén unha entrevista a Ana Ermida e reseñas de Antonio Veiga, Montse Porteiro e Dámaso Ratoeira, como integrantes do actual grupo municipal na corporación barreirense.
Segundo Ana Ermida, “a edición deste número da Xanela vén a complementar o traballo de contacto directo coa veciñanza que se está a facer desde o Bloque en Barreiros. Estes tres anos apostamos por estar permanentemente en contacto coas veciñas e veciños, con moito traballo de corpo a corpo e presenza importante nas parroquias, con visitas e reunións.”
“Aínda que as nosas propostas e iniciativas son trasladadas directamente nas asembleas que vimos realizando nas parroquias, quixemos tamén recollelas de xeito resumido na Xanela, para achegala a todos os fogares barreirenses”, aseguran.
Desde o BNG anuncian que proximamente realizarán novas reunións nas parroquias, fundamentalmente para recoller propostas ou inquedanzas que queiran trasladarlles de cara a elaborar o programa electoral das municipais de maio.
Así, o BNG adiántase e xa ten iniciado en Barreiros o traballo electoral para afrontar as vindeiras municipais “cargadas de ideas, propostas, ilusión e ganas de sacar a Barreiros deste despropósito no que o ten sumido o goberno do Partido Popular. Temos equipo, temos capacidade e temos posibilidades. Nestes meses traballaremos para que ninguén que queira que en Barreiros se produza un cambio quede sen participar e tomar parte neste proxecto que é, sen dúbida, o máis ilusionante para este concello nos últimos anos”, conclúe Ana Ermida.