Non houbo mercado en Ribadeo e o goberno mantén que non cambiará a ordenanza reguladora

RIBADEO .- O alcalde de Ribadeo, Fernando Suárez, asegurou tras a reunión de dúas horas e media que mantivo onte pola tarde cunha representación dos vendedores ambulantes do mercado dos mércores que “o equipo de goberno non acepta revisar unha ordenanza que foi aprobada en pleno no ano 1998 porque nos parecería unha inxustiza para todos os que estiveron pagando polo que ocupan ao longo de todo este tempo”. Hoxe de novo ningún posto foi montado no mercado semanal dos mércores en Ribadeo

O rexedor tildou de “lamentable a actitude destes voceiros porque eles só querían falar do prezo por metro cadrado que deben pagarlle ao Concello por vender no mercado dos mércores. Acusáronnos de cambiar a ordenanza e nós non cambiamos nada, só estamos a aplicala. E nós reprochámoslles unha serie de cousas, coma a falla de limpeza cando remata o mercado, a demora no pago dalgúns dos seus compañeiros, postos que están ocupados por persoas distintas ás autorizadas ou que algúns vehículos están aparcados en pleno mercado dificultando o tránsito dos clientes. Todo o foron entendendo na xuntanza desta tarde… a única discrepancia é que pretenden que cambiemos a ordenanza reguladora e non a vamos cambiar, non debemos non podemos cambiala porque foi creada por outro goberno e porque entendemos que é correcta”. Fernando Suárez aclarou que “nós nos estamos a subir as taxas, senón que estamos a aplicar o que marca a normativa municipal. Hai vendedores que pasaron de pagar 50 a 80 euros, outros que pasaron de 90 a 120 ou de 30 a 45, e hai uns cantos aos que as cifras se lles multiplican porque ocupan moito máis do que tiñan autorizado. Non é porque se creara unha nova ordenanza”.

Nova medición

O alcalde de Ribadeo dixo que “incluso lles chegamos a propoñer para que comproben que a ordenanza non se cambiou que se realice unha terceira medición da superficie que ocupan os seus postos cos mesmos funcionarios e cun testigo designado por eles, pero fóronse polos cerros de Úbeda. O prezo é o que está aprobado por todos os grupos políticos do Concello e xa me estranaría que agora a oposición quixera votar outra cousa e aproveitarse de que o río vai revolto”.

Fernando Suárez convidou aos vendedores “aos que non lles vai nin lles ven esta historia, coma os da fruta e a verdura a que non se sintan coaccionados á hora de montar os seus postos mañá de xeito pacífico e aos que estiveron a cumprir coa ordenanza. Agardo que non se produzan coaccións ou ameazas porque senón os autores non voltarán a poñerse máis neste mercado. Nós tentamos establecer un cauce de normalidade que nunca se debeu perder”.