Portos de Galicia ampliará e optimizará instalacións electricas dos peiraos da costa de Lugo

SANTIAGO .- Portos de Galicia, ampliará e optimizará instalacións electricas dos portos de Ribadeo, Foz, Burela, San Cibrao, Morás, Viveiro, Celeiro, O Vicedo na provincia de Lugo e os de O Barqueiro, Bares, Espasante, Cariño e Cedeira na de A Coruña. O orzamento base de licitación é de 2.019.512,06 euros e o prazo para a súa execución de 18 meses.

REFERENCIA

Portos de Galicia ampliará, mellorará e modernizará as instalacións electricas dos 13 portos da zona norte

*
A posta en marcha desta actuación suporá un investimento de máis de dous millóns de euros
*
Corresponden aos de Ribadeo, Foz, Burela, San Cibrao, Morás, Viveiro, Celeiro, O Vicedo na provincia de Lugo e os de O Barqueiro, Bares, Espasante, Cariño e Cedeira na de A Coruña
*
Preténdese ir eliminando os subministros externos dos diferentes concesionarios co fin de que, nun horizonte próximo, o único subministrador de enerxía eléctrica sexa o ente público

Santiago, 27 de xullo de 2009.- A Consellería do Mar, a través de Portos de Galicia, ampliará, mellorará e modernizará as redes eléctricas en todos os portos da Zona Norte. Os portos e peiraos que estarán afectados polas obras corresponden aos de Ribadeo, Foz, Burela, San Cibrao, Morás, Viveiro, Celeiro, O Vicedo na provincia de Lugo e os de O Barqueiro, Bares, Espasante, Cariño e Cedeira na de A Coruña. O orzamento base de licitación é de 2.019.512,06 euros e o prazo para a súa execución de 18 meses.

As actuacións a levar a cabo nos diferentes portos estarán divididas en dous grupos; actuacións en media tensión e actuacións en baixa tensión. As primeiras, refírense a instalacións a 20 kilovoltios, entre as que se inclúen liñas de media tensión, centros de secionamento ou reparto e centros de transformación de media a baixa tensión. As segundas refírense a instalacións de ata 400 voltios, entre as que se inclúen redes de distribución, cadros de medida, cadros de proteccións e servizo, e instalacións de alumeado público. En ambos casos inclúense as obras auxiliares de albanelería, apertura e peche de gabias, preparación e acondicionado de terreos e incluso pequenas obras de embelecemento. Sinalar que as actuacións en media tensión realízanse exclusivamente no porto de Cariño. Esta actuación é consecuencia da necesidade de corrixir as deficiencias detectadas nestas instalacións.

Con esta medida Portos de Galicia pretende ir eliminando os subministros externos aos establecementos e instalacións dos diferentes concesionarios, implantados nos recintos portuarios, co fin de que, nun horizonte próximo, o único subministrador de enerxía eléctrica sexa o propio ente público, a través das súas redes, e a partires dos puntos de conexión coa distribuidora de cada zona.