O BNG insta a Xunta de Galiza a que poña en marcha un Plano de Apoio aos autónomos da provincia de Lugo

REFERENCIA

Á Mesa do Parlamento

O Grupo Parlamentar do Bloque Nacionalista Galego (BNG), por iniciativa do seu deputado Fernando Xabier Blanco Álvarez e ao abeiro do Regulamento da Cámara, presenta a seguinte Proposición non de lei para o seu debate en Comisión.

Os dados que ven de facer públicos o Observatorio polo Emprego dependente do Ministerio de Traballo e Asociación Española de Traballadores Autónomos, corroboran que no mes de marzo a destrución de emprego entre aqueles que cotizan no Réxime Especial Autónomo equiparouse en Galiza á media do Estado. A situación tornase máis preocupante se atendemos a que no ámbito de Galiza a provincia que encabeza a destrución de emprego autónomo é a de Lugo e, dentro desta, A Mariña Oriental e A Mariña Central. Tanto é así que no último ano na provincia de Lugo cesaron na súa actividade máis de 6000 autónomos, a metade dos cales se concentran nas tres comarcas da Mariña.

A este respecto folga dicir que a crise cebouse de xeito moi particular con este colectivo, destacando a desaparición do emprego no sector comercial e da hostalería, como consecuencia da caída do consumo, así como aquelas persoas que desenvolvían a súa actividade en ocupacións relacionadas co sector da construción e da promoción inmobiliaria. Non nos debe estrañar logo as consecuencias que está a xerar na comarca da Mariña, dada a exposición da mesma, a actividade inmobiliaria e a repercusión que a mesma tiña en todo o resto do ciclo económico. Agora ben, con independencia dos factores vinculados á sobreprodución, a razón central que explica estes dados é os problemas de liquidez que tiveron que enfrontar os autónomos ao cortarse a billa do crédito e non responder os organismos públicos a solventar esta situación para xerar circulante que permitise que a actividade continuase. Mesmamente, hai que ter en conta que o cese da actividade dáse tamén en negocios que mesmamente sendo rentábeis non poden facer fronte aos problemas de financiamento.

Aínda así, seguemos a estar diante dunha actividade vizosa tanto no que ten a ver coa man de obra ocupada como no que representa no PIB da Provincia. Só no caso do sector comercial e da hostalería o número de establecementos supera os 10.000 en Lugo, representando máis do 15 do PIB do noso territorio. Neste sentido hai que ter en conta que a día de hoxe no réxime especial de autónomos en Lugo seguen rexistradas preto de 30.000 persoas que están a atravesar unha situación de fonda dificultade, até o punto de que, de non mediar unha actuación decidida por parte das administracións, poderían correr a mesma sorte daquelas 6000 persoas ás que nos referíamos no primeiro parágrafo.

O Bloque Nacionalista Galego, partindo de que é a Xunta de Galiza quen ten as competencias plenas en materia de comercio e de hostalería e que a súa vez conta con instrumentos financeiros que permiten bombear crédito ao tecido produtivo, demanda un cambio de actitude por parte da mesma e, xa que logo, unha actitude decidida de apoio ao sector dos autónomos. Asemade consideramos fundamental que no seu ámbito competencial é necesario tamén que cumpra e obrigue ao cumprimento do establecido na lexislación, no referido ao cumprimento do prazo dos pagos a fin de que os autónomos non operen como auténticas financeiras e as administracións públicas e a propia empresa privada lle transfira a estes a súa falta de liquidez.

Polo exposto, preséntase a seguinte Proposición non de lei para o seu debate en Comisión:

O Parlamento galego insta a Xunta de Galiza a que poña en marcha un Plano de Apoio aos autónomos da provincia de Lugo creando dentro do IGAPE liñas específicas de financiación para circulante e reestruturación de pasivos que permita o acceso dos mesmos ao crédito.