Nota de prensa
A Deputación aproba o Plan Lugo Emprega que dará traballo a 712 parados da provincia
– Gómez Besteiro anuncia que este mércores remitirá por rexistro unha comunicación oficial a todos os Concellos para que se adhiran ó Plan, logo de facer pública a distribución de empregados por municipio
– O Pleno acorda por unanimidade dar de baixa a Guillermo Leal, quen abandona o Partido Popular e pasa a formar parte do grupo dos non adscritos con outro anterior Deputado do PP
– Entra en vigor o novo Regulamento da Deputación que permite unha maior democratización da institución, reforza o pacto anti-transfuguismo, e completa o cumprimento de todo o programa de goberno asinado por PSOE e BNG na toma de posesión
O Pleno da Deputación aprobou este martes, cos votos en contra do Partido Popular, o novo plan“Lugo Emprega” co que o organismo provincial reducirá o número de parados na provincia ó tempo que incrementa a cooperación cos Concellos. O perfil das 712 persoas que se contratarán durante seis meses serán, fundamentalmente, operarios municipais que prestarán o seu servizo en labores de mantemento, conservación e mellora dos servizos públicos de carácter local.
Despois da aprobación do Pleno, iníciase de inmediato o proceso de contratación, de tal xeito que este mércores remitirase por rexistro unha comunicación oficial a todos os Concellos para que se adhiran ó Plan. Estes terán un prazo de sete días para formalizar a súa contestación, que é absolutamente improrrogable. O Plan, dotado con 8 millóns de euros a cargo do Presuposto da Deputación, estará operativo a finais de xaneiro. A contratación dos traballadores establece as seguintes condicións: no caso dos municipios de máis de 5.000 habitantes e con máis de 500 persoas en paro, a Deputación asume o custe total da contratación, mentres que as entidades locais encargaranse da selección dos traballadores, formalización dos contratos e adxudicación de destino co material necesario correspondente.
Nos de menos de 5.000 habitantes ou con menos de medio milleiro de desempregados, o organismo provincial non só financia a contratación, senón que realiza a selección dos traballadores porque os Concellos pequenos non dispoñen de todos os recursos para facelo.
Reparto segundo criterios obxectivos
Todas as entidades locais contarán cun mínimo de 4 efectivos, de tal xeito que o máximo de traballadores, un total de 73, asignaráselle ó Concello de Lugo, que representa un 10% do Plan. De acordo cos criterios obxectivos, tomando como referencia a porcentaxe que representa a poboación de cada un dos municipios en relación coa total da provincia, excluíndo ó da capital, a distribución será a seguinte: municipios de ata 1.000 habitantes: 4 traballadores; entre 1.001 e 3.000: sete; entre 3.001 e 5.000: 9; entre 5.001 e 7.500: 13 traballadores; e entre 7.501 e 10.000 habitantes: 20 traballadores. No caso das entidades locais que superen os 10.000 veciños asignaráselles un traballador máis por cada mil habitantes. É o caso de Sarria que queda con 24; Viveiro con 27; Monforte de Lemos con 30; Lugo con 73; e Vilalba con 26.
Neste senso, o Presidente en reposta ó presidente do Grupo provincial do PP, José Manuel Barreiro, subliñou que “ogallá que nos viñera un plan da Xunta semellante. A ver se somos capaces de chamarlle ó pan pan e ó viño viño. A proba do algodón terémola cando saibamos quenes se adhiren e quenes non. Lémbrolle que a Deputación non é a que ten as competencias directas en políticas activas de emprego. Élle o señor Feijóo”. A este respecto, o Presidente criticou que fronte ó goberno autonómico que só concedeu obradoiros de emprego nos Concellos do Partido Popular, o organismo provincial desenvolve un plan para todos os municipios da provincia. “Isto non é unha lotería como as Escolas Obradoiro que lle tocaron a Palas de Rei, Carballedo, Ourol, Láncara, Antas de Ulla, Valadouro, Friol… Aquí van todos. Dirá que é un reparto inmoral, pero elle ben xusto. Espero que nas vindeiras convocatorias do señor Feijóo se primen os nosos criterios. Que pensaba que iamos a facer as cousas como as fan vostedes? Esta é a mellor forma de traballar: con criterios obxectivos”.
A Deputación realiza este investimento millonario sen aumentar a débeda pública. Permitirá, ademais, a creación do obradoiro de documentación “Os Arquivos do Pazo”, no que traballarán 14 persoas que se suman ás 4 existentes do Arquivo. Estará a pleno rendemento a finais de febreiro e será responsable da catalogación e dixitalización da documentación deste departamento.
Outra baixa no Partido Popular
Asimesmo, acordouse por unanimidade dar de baixa no Partido Popular ó Deputado desta formación política Guillermo Leal Arias. Previamente, o responsable do PP, José Manuel Barreiro, remitiu un escrito no que solicita a súa dimisión porque este Deputado -quen actúa en representación do Partido Xudicial de Mondoñedo- tamén pasou ó grupo dos nos adscritos no Concello de Viveiro xunto a máis concelleiros populares. Neste senso, Barreiro comunicou que Guillermo Leal será substituído na Comisión Informativa de Persoal e Réxime Interior polo Deputado e Alcalde de Paradela, José Manuel Mato Díaz e, na de Infraestruturas, por Jesús Carreira Ferreiro, Alcalde de Guntín.
Esta nova baixa súmase á protagonizada polo abandono anterior do Deputado chantadino Manuel Varela. O Partido Popular concluirá a lexislatura con 9 dos 11 Deputados cos que comezou, se non volve rexistrar máis cambios.
Máis rigor e transparencia
O Pleno da Deputación tamén aprobou por unanimidade o novo regulamento da institución, que substituirá ó actual que data de 1985. O novo documento, que obtivo o consenso de todos os grupos políticos, permite dar un paso máis na democratización desta institución, dotándoa dunha maior transparencia e rigor. O actual equipo de goberno xa deu o primeiro paso neste eido permitindo a participación da Oposición nas mesas de contratación, nos órganos de control e fiscalización, e coa creación dos locais e equipamentos para os grupos políticos –unha reivindicación histórica non antes acadada-. Coa aprobación do novo documento, PSOE e BNG cumpren ó 100% o programa de goberno asinado na toma de posesión, en xullo do 2007.
O novo regulamento será un paradigma para os Concellos da provincia, xa que moi poucos dispoñen dun documento semellante ou, os que existen, están obsoletos. Ademais de ser un compromiso político, é un instrumento organizativo moderno que contempla cuestións que non estaban regulamentadas como o dereito á información e a categoría dos grupos políticos nos adscritos. Asimesmo, establece as normas para evitar o transfuguismo, prohibindo ós Deputados integrarse nun Grupo distinto a aquel no que o fixeron inicialmente.
800.000 euros de axudas
Tamén se prestou aprobación, coa abstención do Partido Popular, ó Plan Estratéxico de Subvencións do INLUDES, de 800.000 euros e co que o Instituto de Desenvolvemento Económico e Social seguirá promocionando o emprego no 2011 e potenciando os sectores estratéxicos da provincia. Este é o 3º Plan que aproba o INLUDES e que resposta ás principais liñas do Orzamento do vindeiro ano: aposta polo sector agrogandeiro e medio rural; administración electrónica; creación de emprego; e a aposta polo medio ambiente e artesanía. O INLUDES adiantou 3 meses a aprobación deste instrumento de colaboración económica con respecto a 2010. Asimesmo, tamén se deu o visto e prace ás bases do Plan de Comunidades Veciñais de 2011, dotado con 2,3 millóns de euros.
Pasadas as 13:30 horas deste luns, o 112 Galicia tivo constancia, a través de Urxencias Sanitarias de Galicia-061, dun ciclista que se atopaba en parada cardiorrespiratoria no quilómetro 1 da LU-151, á altura da parroquia de Fazouro. De inmediato, os xestores do Centro Integrado de Atención ás Emerxencias solicitaron a colaboración dos axentes da Garda Civil de Tráfico e da Policía Local de Foz. Malia os esforzos, os profesionais sanitarios só puideron confirmar o falecemento da persoa.
A variada oferta de produtos de artesanía e de alimentación de temporada e proximidade á venda complementouse con degustacións de minihamburguesas de carne de raza Limiá e empanada de carne de porco celta e tenreira de raza Caldelá, que se repartiron gratuitamente entre as peroas que fixeron algunha compra no Mercadiño.
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados.
Cada participante pode presentar unha única fotografía, en papel e formato dixital, seguindo as bases dispoñibles na web da Deputación. A celebración do aniversario inclúe actividades como a Xornada de Degustación da Tenreira de Ancares, unha xornada micolóxica e un obradoiro de rescate na montaña, ademais doutras propostas ambientais e divulgativas nos próximos meses.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
