Aclara o PP que a nova lei de augas exime de pagos os usos agrícolas, gandeiros e forestais

Nota de prensa:
Balseiro e Álvarez Chao salientan que o canon de auga vén a substituír o actual de saneamento por unha esixencia da directiva marco da Unión Europea que busca garantir un uso racional e sostible da auga

OS DEPUTADOS POPULARES ACLARAN QUE A NOVA LEI DE AUGAS EXIME DO PAGO OS USOS AGRÍCOLAS, GANDEIROS E FORESTAIS E POSIBILITA QUE TRAÍDAS VECIÑAIS E POZOS PARTICULARES TAMPOUCO TEÑAN QUE PAGAR

* Censuran que o BNG “estea a desinformar a xente” con falsidades tales como que hai que instalar contadores de auga.

* A nova normativa incentivará o uso responsable da auga xa que será por treitos de consumo, a taxa dependerá do número de residentes na vivenda, terá en conta ás familias numerosas e contará cunha tarifa social que permitirá que máis dun 30% da poboación se beneficie da mesma pagando menos que coa actual

Barreiros, 26 de xaneiro de 2010.- Os deputados do Grupo Parlamentario Popular, Emma Álvarez Chao e Jose Manuel Balseiro, acompañados polo Alcalde de Barreiros, Alfonso Fuernte Parga, salientaron hoxe en rolda de prensa en relación coa nova Lei de Augas que o canon de auga que vén a substituír o actual canon de saneamento e é unha esixencia da Directiva Marco da Auga Europea que establece que “antes do 2010 o recibo da auga que pagan os cidadáns europeos deberá incluír todos os custes de subministro incluíndo o tratamento e xestión das augas residuais”.

Os parlamentarios do PPdeG destacan que o novo canon incentivará o uso responsable da auga, xa que se establecerá por treitos de consumo e dependerá do número de residentes na vivenda. De feito os populares insistiron en que “non se vai pagar máis” senón que o que se vai facer é unha tarificación diferente, en función do consumo e no que aqueles que son conscientes da importancia de aforrar auga salgan beneficiados. Balseiro e Álvarez Chao insistiron en que un 30% dos abonados pagarán menos do que o están facendo actualmente. Ademais, haberá bonificacións do 50% para as familias numerosas. Os deputados populares puxeron un exemplo do que sucederá: Unha familia con tres fillos que agora mesmo estea a abonar 12 euros pasará a pagar soamente 6.

REBATENDO FALSOS ARGUMENTOS DO BNG

Os deputados populares acusaron ao BNG de estar facendo unha campaña de intoxicación “porta a porta” e de ahí que corresponda clarexar todo o referente a esta nova taxa. Balseiro e Álvarez Chao explicaron que “os usos agrícolas, gandeiros e forestais quedan exentos do pagamento do canon da auga” e que “na práctica tampouco terán que aboar os usuarios de captacións propias ou comunais, xa que a lei establece para as comunidades de usuarios, traídas veciñais e pozos particulares unha bonificación do 90%, polo que o seu cobro resulta antieconómico para a Administración”.

Álvarez Chao e Balseiro sinalaron que é “rotundamente mentira” que haxa que pór contadores. E insistiron en acusar ao BNG de facer malgastar o diñeiro aos veciños: “A nos xa viñeron varias persoas que mercaron contadores porque os do Bloque lles dixeron que ían ser obrigatorios para as traídas veciñais e para os pozos das familias. Iso non é certo. ¿Vailles devolver vos cartos a xente do BNG?”

USO RACIONAL E SOSTIBLE DA AUGA

A nova Lei de Augas “establece un novo marco xurídico galego que garantirá a auga en calidade e cantidade á cidadanía, promovendo un uso racional e sostible, o que implicará unha mellora na xestión dos recursos hídricos de Galicia”, sinalan os deputados do Grupo Parlamentario Popular, para os que resulta “incrible” que os nacionalistas “continúen coa súa teima de oporse a todo o que supón un claro beneficio”.

“Os nacionalistas demostran que non teñen nada positivo que achegar ao dedicar o tempo a desinformar e crear alarma con falsidades”, apuntan os deputados, quenes insisten ademais que a Lei de Augas ven imposta pola transposición dunha Directiva europea de obrigado cumprimento.