O BNG de Ribadeo di que entende que hai motivos máis que sobrados para apoiar a folga xeral

Nota de prensa

BNG DE RIBADEO

Ante a folga xeral do 27 de xaneiro

Desde o BNG de Ribadeo entendemos que hai motivos máis que sobrados para apoiar a folga xeral convocada pola CIG para este xoves 27 de xaneiro. As políticas de axuste practicadas polo goberno central e pola Xunta de Galiza son moi negativas tanto para os asalariados como para os traballadores autónomos e os pequenos empresarios.

Desta volta estamos a falar das pensións, do retiro máis que merecido ao que aspiramos todos e todas nós. Despois de teren enchido as arcas dos grandes bancos, agora, o Estado ten que sanear as súas contas cargando sobre as nosas costas a responsabilidade dunha crise que non xeramos nós.

A algúns líderes políticos estalles a ser moi fácil pedir sacrificios aos máis débiles e desprotexidos e non se atreven a esixir explicacións a aqueles que nos meteron nesta lameira. ¿Quen pode admitir como normais e naturais indemnizacións millonarias a altos cargos de empresas que houbo que sanear con diñeiro de todos e, pola contra, querer esixir ata 41 anos de cotización para podermos xubilarnos aos 65 anos?

Que unha persoa de 50 anos que leva traballando 30 e se vexa agora no paro porque a súa empresa foi á creba (por non poder refinanciar a débeda porque non hai liña de crédito) pense como vai conseguir chegar ata os 67 anos na recta final da cotización para a súa vellez.

Que un home de 35 anos, que a duras penas comezou a traballar con contratos temporais e agora se enfronta a duros anos de escaseza de traballo, pense como vai acadar os 41 anos de cotización dos que se fala para chegar ao 100% da pensión.

Que un universitario ao que cada vez se lle pechan máis as portas do mundo da investigación pola drástica redución en investimentos en I+D pense como vai poder lograr eses 41 anos de cotización.

Que un mozo de 20 anos, que traballa con horarios intensísimos, pense se vai chegar tan fresco aos 67 anos con ese ritmo de traballo.

En todo caso, o que vai pasar é que diminuirá a contía das nosas pensións por non termos logrado o 100% da cotización. Calcúlase que as pensións galegas poderán perder ata un 20% do seu valor. E non son precisamente as máis altas do Estado.

Todos sabemos que desta volta vanlle dar unha boa trincada ás pensións e tamén aos dereitos laborais. A nada que nos paremos a pensalo, comprobaremos que hai razóns máis que sobradas para protestar contra a política económica do goberno central, agora metido a sancristán dos mercados, e tamén contra a Xunta, por non usar o autogoberno galego para facer fronte a unha situación tan difícil e dedicarse a privatizalo todo en beneficio de tres ou catro.

Fagamos do noso dereito á folga un acto cívico e reivindicativo co que expresar a nosa carraxe cara a estes incompetentes que nos gobernan tanto en Madrid como en Santiago. Paremos o 27 de xaneiro. Acudamos a Burela á manifestación que partirá ás 12 horas da rúa Arcadio Pardiñas e rematará na Praza da Mariña.