Nota de prensa:
ANTÓN BAO PRESENTOU A IV VOLTA CICLISTA ÁS COMARCAS DE LUGO E A COPA LUGO 2011
A proba disputarase entre o 3 e o 5 de xuño con tres etapas con saída e chegada en Lugo, Riotorto e Monforte de Lemos, respectivamente
O nivel da proba está garantido e consolidado nesta cuarta edición coa participación de máis de 15 equipos Elite/sub-23
LUGO, 16 de maio de 2011. O vicepresidente da Deputación, o nacionalista Antón Bao presentou esta mañá na Deputación a IV Volta Ciclista ás Comarcas de Lugo que se disputará entre os días 3 e 5 de xuño, con etapas coa saída e chegada en Lugo, Monforte de Lemos e Riotorto. Na presentación estivo o presidente da agrupación organizadora Club Ciclista Cidade de Lugo, Eugenio Paz Fernández, xunto aos representantes dalgúns concellos polos que transcorren as etapas como o alcalde de Rábade ou o concelleiro de Turismo e Deportes de Lugo, Xosé Manuel Grandío, e Santiago Seijas Alfonso, director da proba.
Na súa intervención, Antón Bao auguroulle un prometedor futuro a este campionato logo do “gran éxito acadado nas súas primeiras tres edicións, o que xa consolidou a proba, e que, de seguro, se repetirá este ano”. Nesta liña, o vicepresidente da Deputación de Lugo lembrou que un dos obxectivos da Área de Deportes desta entidade é o de “fomentar a práctica do deporte, sexa cal sexa a súa disciplina, en todas e cada unha das comarcas lucenses”. Así, o nacionalista resaltou que “seguimos traballando para descentralizar a práctica e a organización de determinados eventos deportivos”, un feito que suporá “un forte impulso socioeconómico” para as zonas nas se poñan en marcha este tipo de iniciativas porque “nas comarcas de Lugo, e de Galiza por extensión, contamos cun impresionante patrimonio natural e paisaxístico que debe ser posto en valor, como un concepto, o da paisaxe, froito da interpretación histórica do contorno natural, rural ou urbano en clave cultural, o que nos define na nosa identidade como país”. Bao explicou que “coa organización desta IV Volta Ciclista ás Comarcas de Lugo queremos recoller para pór en valor conxuntamente as potencialidades dos nosos ciclistas e do noso territorio, facendo que o transcurso da competición ciclista sirva tamén para facer conscientes a propios e alleos dos valores do noso territorio e paisaxe, e que isto repercuta socieconomicamente na zona”.
A IV Volta Ciclista ás Comarcas de Lugo disputarase o 3, 4 e 5 de xuño, coas etapas Lugo-Lugo, Monforte de Lemos-Monforte de Lemos, e Riotorto-Riotorto esta última de gran dificultade para os corredores xa que conta con varios portos de primeira categoría como son a subida ao Marco de Álvare ou á Cruz da Cancela. Os equipos participantes son os galegos do Autronic de Vigo, Aluminios Cortizo de Padrón, Caeiro de Cambre e Novacaixagalicia. Doutros países e rexións do estado español proveñen o Bidelan-Kirolgi do País Vasco, Tarragona-Mopesa de Cataluña, Mútua de Levante-Café Max e Asfaltos Guerola-Valencia Terra i Mar de Valencia, Caja Rural de Navarra, Ciudad de Oviedo-Nesta e Construcciones Paulino de Asturias, Camargo-Ferroatlántica de Cantabria, aos que hai que engadir o Maia e o Loule de Portugal e o Lokomotiv ruso.
O presidente do Club Ciclista Cidade de Lugo, Eugenio Paz, agradeceu o esforzo que a Área de Deportes da Deputación fixo desde os seus inicios por poñer en marcha esta proba ciclista e o constante apoio, sobre todo neste ano, lembrou, no que moitas probas ciclistas por etapas tiveron que deixar de celebrarse pola baixada do apoio económico por mor da crise.
Copa Lugo 2011
Ademais, dentro do traballo de promoción do ciclismo desde a base, presentouse a Copa Lugo 2011, unha competición que constará de catro probas para principiantes, alevíns e infantís que se disputarán en diferentes concellos lucenses. Estas probas terán lugar o 28 de maio na Pastoriza (no circuíto de karts), o 11 de xuño en Rábade, o 15 de agosto en Outeiro de Rei (no circuíto de Robra) e o 8 de outubro en Lugo, na avda. Ramón Ferreiro.
Estas probas, para os nenos e nenas de categoría principiante consistirá nunha xincana, mentres que para os alevíns e infantís serán probas de varias voltas a un circuíto. Ao estar a Copa Lugo inscrita no calendario da Federación Galega de Ciclismo participarán clubs de toda Galiza.