A Xunta destina 2 millóns de euros á prevención da contaminación mariña e á inspección pesqueira

Nota de prensa:
A XUNTA DESTINA MÁIS DE 2 MILLÓNS DE EUROS Á PREVENCIÓN DA CONTAMINACIÓN MARIÑA E Á INSPECCIÓN PESQUEIRA DE GARDACOSTAS

§ A Consellería do Mar prorroga o contrato para a xestión das actuacións realizadas a través de medios marítimos

A Xunta destinará 2.406.539 euros á prevención da contaminación mariña, a tarefas de salvamento marítimo e aos labores de inspeccións pesqueira de cara a dar cobertura aos profesionais do mar. Faino a través da cuarta prórroga do contrato entre o servizo de Gardacostas e a empresa Remolcanosa para a xestión das actuacións realizadas a través de medios marítimos, que hoxe foi aprobada polo Consello da Xunta. A Consellería do Mar tramitou a prórroga deste contrato axilizando a eficacia dos servizos ante calquera posible emerxencia da costa galega.

Para a prestación do servizo, a Xunta pon como medios á disposición do contratista o remolcador de salvamento Sebastián De Ocampo, o buque de salvamento e apoio Irmáns García Nodal, o buque polivalente Valentín Paz Andrade e a patrulleira Paio Gómez Chariño. Ademais, cóntase co buque Ría de Vigo, contratado pola Xunta de Galicia e a Axencia Europea de Seguridade Marítima.

O acordo inclúe a realización de todas aquelas actuacións dirixidas a adoptar medidas de preservación do medio mariño e dos seus recursos, tales como o control e a prevención da contaminación mariña. Tamén recolle as accións dirixidas a auxiliar e protexer ás persoas, os bens e o medio mariño e asegurar a conservación do medio no ámbito das competencias da Comunidade Autónoma de Galicia. Ademais inclúe todos os labores de apoio a calquera actividade relacionada coas responsabilidades da Consellería.

O contrato, que se estenderá ata o 31 de decembro de 2011, obriga tamén á dotación de persoal suficiente para asegurar a prestación do servizo durante os 365 días do ano as 24 horas do día nos buques para atender con inmediatez calquera incidente que se produza en augas da Comunidade Autónoma.