Mar responde ao BNG que “os convenios para a recuperación do marisqueo das áreas de zona C terán continuidade”

Nota de prensa:

MAR RESPONDE AO BNG QUE “OS CONVENIOS PARA A RECUPERACIÓN DO MARISQUEO DAS ÁREAS DE ZONA C TERÁN CONTINUIDADE”

Bieito Lobeira avanzou que o BNG seguirá moi de cerca o cumprimento deste compromiso formulado pola directora do INTECMAR en sede parlamentar

Santiago de Compostela, 22 de setembro, 2011. O portavoz de pesca do BNG, Bieito Lobeira formulou hoxe unha pregunta na comisión de pesca, celebrada no Parlamento galego sobre a actividade produtiva e emprego nos bancos marisqueiros clasificados como Zonas C e a garantía das rendas de ingresos do colectivo de mariscadoras e mariscadores.

A Directora do Instituto Tecnolóxico para o Control do Medio Mariño (INTECMAR), Covadonga Salgado respondeu ao parlamentario do BNG que os convenios para a recuperación do marisqueo das Zonas C se asinarán coas confrarías e afirmou que o primeiro obxectivo da Consellaría do Mar é “acadar a maior calidade nas augas galegas”.

Na súa intervención, o nacionalista asegurou que a Consellaría do Mar eliminou todos os convenios subscritos coas confrarías para a recuperación do marisqueo nas áreas catalogadas como zonas C que non poden comercializar en fresco o marisqueo extraído nin sequera sobmétendoo a procesos de depuración intensiva.

Neste sentido, manifestou que o Goberno do Partido popular prefire “aforrar cartos” nos colectivos que máis o precisan e agora “a situación non mellora” xa que tras dous anos, a actual Consellaría do Mar precipitadamente e sen consulta nin negociación dicide eliminar estes convenios.

O parlamentario do BNG afirmou que as consecuencias desta medida poden ser “desastrosas” para as rías de Ferrol e A Coruña que padecen graves problemas da contaminación e sedimentación así como o furtivismo organizado.

Asemade, o nacionalista comparou o número de zonas A e C entre as costas de Andalucía, Valencia ou Asturias e as de Galiza das que dixo que “a efectos de produción”, o litoral galego supera en grande medida ás anteriores e sen embargo temos peor calidade de augas e “deberíamos dar exemplo ao resto do litoral do Estado español e de Europa no coidado e na protección do noso litoral”-dixo-.

Trala resposta da responsable da Consellaría do Mar, o parlamentario avanzou que o BNG fará un seguimento do compromiso coas confrarías e as medidas que tomará Mar para mellorar a calidade das augas galegas.

Noutra orde de cousas, o deputado tamén se interesou pola localización da batea a fondear para a plena depuración do marisco procedente de Zona C ao que a directora do INTECMAR non respondeu sobre prazos nin emprazamento.