Elena Candia anuncia a presentación dunha moción no pleno provincial en apoio desta empresa que representa o principal motor económico e laboral da comarca da Mariña
O Grupo provincial popular transladará ao pleno provincial unha solicitude para instar ao Goberno Central á rebaixa da tarifa eléctrica de Alcoa
A medida busca ampliar o respaldo á petición que a Xunta de Galicia formalizará diante do Ministerio de Industria sumando o apoio do ente provincial
Lugo, 17 de abril de 2012.- A voceira do grupo provincial popular, Elena Candia, afirmou que a formación política á que pertence trasladará ao pleno provincial unha solicitude para instar ao Goberno central á rebaixa da tarifa eléctrica de Alcoa.
Candia sinalou que esta medida pretende ampliar o respaldo co apoio do ente provincial á petición que a Xunta de Galicia trasladará diante do Ministerio de Industria.
A voceira dos populares destacou a importancia desta empresa que, representa o principal motor económico e laboral da comarca da mariña. Lembrou Candia que a factoría de San Ciprián xera máis de 1.300 empregos directos e preto de medio millar máis de xeito indirecto e, que ademáis, dispón dun centro de traballo na cidade da Coruña.
Candia insiste na necesidade dunha revisión á baixa das tarifas de acceso que abonan as empresas grandes consumidores de enerxía, como Alcoa e respalda o feito de que a factura inclúa só e exclusivamente os custos asociados ás redes e os de operación do sistema -e, polo tanto, que o prezo final sexa o mínimo posible- así como que se manteña o servizo de xestión de interrumpibilidade da demanda polo que Alcoa recibe un desconto na factura definitiva.
A voceira dos populares sinalou que o ente provincial terá a oportunidade de sumarse e fortalecer esta reivindicación dirixida a servir de apoio da empresa que representa o principal motor económico e laboral da comarca da Mariña. Candia agarda acadar a unanimidade dos tres grupos no pleno provincial.
Remitido