6.000 € EN DIETAS DO ALCALDE DE BURELA
No Pleno que se celebrou onte en Burela demostrouse, unha vez máis, que o equipo de goberno do PP se caracteriza pola súa nula xestión: ningún proxecto novo, ningunha iniciativa de novas obras e servizos, nada de nada. Só dous temas, de puro trámite administrativo, para encher un Pleno que evidenciou a falta de traballo e xestión do grupo de goberno: a adxudicación definitiva do servizo de axuda no fogar (un punto que, obrigatoriamente, debe de aprobarse en Pleno pola cantidade económica de que se trata) e a aprobación dun protocolo do ano 2006 sobre coordinación dos distintos axentes de seguridade e axentes sociais para a violencia de xénero (o tema a aprobar era simplemente adherirse a ese protocolo pero sen medidas concretas nin nada de nada.)
Polo tanto, un Pleno baleiro de contido que evidencia a falta de traballo e a incapacidade do equipo de goberno do PP para xestionar o noso concello.
Pero, para o que si serviu este Pleno é para coñecer, a través dos decretos de Alcaldía dos que se dá conta no Pleno, o moito de viaxa o sr. Alcalde a conta dos cartos de todos os veciños e veciñas de Burela.
Nun Decreto de finais de agosto figuran 29 facturas por dietas do Alcalde correspondentes a viaxes a Lugo, Santiago, Coruña, Madrid… das que descoñecemos os motivos da viaxe ou as xestións realizadas nas mesmas.
Pero isto non é algo novo. Se por algo se caracteriza o actual equipo de goberno do PP en Burela, e o Alcalde por enriba de todo, é polo seu gusto por viaxar a conta dos cartos de todos. Ante as nosas preguntas nos Plenos sobre os obxectivos e resultados destas viaxes, o Alcalde sempre elude a resposta e contesta que está facendo xextións para o Concello de Burela. Sen embargo, a realidade demostra que isto non é certo porque nada novo vemos: ningunha nova obra, ningún novo proxecto, ningún novo servizo.
E ante isto, dende o BNG, imos presentar unha pregunta por escrito para que o Alcalde nos explique o motivo das viaxes realizadas, as xestións levadas a cabo e os resultados para a nosa vila desas viaxes.
No que vai de ano 2012, de xaneiro a agosto, o Alcalde pasou facturas por dietas de 52 viaxes que nos van custar a todos os veciños e veciñas de Burela case 6.000 € (case un millón das antigas pesetas). Á parte dos 3.000 € que nos custa o Alcalde cada mes, agora temos que pagar todos case 6.000 € máis polo gusto por viaxar e facer turismo que ten o sr. González Barcia.
Pero, o que é máis grave, de todas estas viaxes e desprazamentos a Lugo, Coruña, Santiago, Madrid…, nada sabemos que fai o Alcalde nelas porque non vemos, no día a día, que Burela teña novas obras, novos proxectos ou novos servizos. Entón, que fai o Alcalde nesas viaxes, que xestións realiza, que temas vai tratar?
Se algo temos claro todos os veciños e veciñas de Burela, porque así o repiten día si e día tamén o Alcalde e o seu equipo de goberno, é que non hai cartos para nada: non hai cartos para luz e hai que apagar farolas, non hai cartos para as activades dos maiores, das mulleres e das Escolas deportivas municipais e por iso hai que cobrarlles aos usuarios, non hai cartos para a cultura ou o deporte, non hai cartos para nada e por iso hai que cobrar por todo (polas instalacións municipais e deportivas, por casar…).
Pero, curiosamente, para que o Alcalde viaxe, non sabemos con que obxectivo e sen ningún resultado visible, para aí si que hai cartos: case 6.000 € nestes últimos oito meses.
Dende o BNG imos pedir explicacións claras e detalladas das xestións realizadas nesas 52 viaxes do Alcalde no que vai de ano. Porque se o Alcalde gasta cartos de todos os veciños e veciñas de Burela, ten que dar explicacións deses gastos: viaxes a Madrid que custaron máis de 800 €, viaxes a Medina del Campo de máis de 300 €, viaxes día si e día tamén a Lugo de 70 € cada día, viaxes a Santiago de máis de 100 € cada día…e, o que nos parece máis ruín e indecente políticamente falando, cobrar tamén por representar ao pobo de Burela nas homenaxes que en Coruña e Santiago se fixeron ao policía burelés que faleceu a comezos de ano en acto de servizo.
O Alcalde ten que dar moitas explicacións sobre este despilfarro en viaxes que non nos aportan nada para Burela. Porque non hai cartos para servizos sociais, non hai cartos para a cultura e o deporte, non hai cartos para novas obras… pero si hai case 6.000 € para que o Alcalde os cobre por viaxar nos oito meses que van de ano polo mundo adiante, non sabemos para que nin por que.
——————-
DIETAS ALCALDE
Decreto | Data Factura | Lugar | Euros | ||||
Nº 75 (12/02/2012) | 10/02/12 | Lugo – Secretaría Xeral Igualdade | 77,45 | ||||
10/02/12 | Lugo – Deputación | 53,95 | |||||
10/02/12 | Santiago e A Coruña | 101,74 | |||||
10/02/12 | Madrid – FITUR | 459,82 | |||||
10/02/12 | Lugo – Deputación e Otea | 73,9 | |||||
10/02/12 | Lugo – Consellería do Mar | 75,45 | |||||
10/02/12 | Lugo – SGAE e Deputación | 78,55 | |||||
Nº 245 (29/03/2012) | 29/02/12 | Lugo – Deputación | 73,9 | ||||
29/02/12 | Santiago – Consellería Sanidade | 92,52 | |||||
29/02/12 | Lugo – Deputación e Coruña avogados | 84 | |||||
29/02/12 | Santiago – Presidente da Xunta | 111 | |||||
29/02/12 | Santiago – Urbanismo e Coruña avogados | 117,73 | |||||
29/02/12 | Lugo – Deputación | 73,9 | |||||
29/02/12 | Portos e Medio Ambiente | 112,85 | |||||
Nº 257 (10/04/2012) | 31/03/12 | Lugo – Consellería de Educación | 73,9 | ||||
31/03/12 | Madrid – Ministerio Fomento | 87,95 | |||||
31/03/12 | Lugo – Deputación e Coruña avogados | 82,7 | |||||
31/03/12 | Lugo | 39,9 | |||||
31/03/12 | Lugo | 73,9 | |||||
31/03/12 | Lugo – varias reunións | 73,9 | |||||
31/03/12 | Santiago – Dir. Xeral Administ. Local | 114,42 | |||||
31/03/12 | Lugo | 39,9 | |||||
31/03/12 | Santiago – Patrimonio | 108,37 | |||||
Nº 576 (22/08/2012) | 03/04/12 | Subdelegación do Goberno | 72,15 | ||||
09/04/12 | Lugo – Empresa Cofrico | 72,15 | |||||
10/04/12 | Coruña – Plan Rede Azul e Santiago homenaxe Rodrigo Maseda | 83,3 | |||||
12/04/12 | Lugo – Comercio, Rural, Educación | 72,15 | |||||
13/04/12 | Lugo – Deputación | 164,95 | |||||
17/04/12 | Santiago – DX. Adm. Local e Patrimonio | 112,32 | |||||
20/04/12 | Lugo – Deputación e Catastro | 72,15 | |||||
26/04/12 | Lugo – Estradas e Deputación | 57,18 | |||||
02/05/12 | Santiago – Portos | 117,57 | |||||
07/05/12 | Santiago – Estradas | 173,1 | |||||
10/05/12 | Lugo – Deputación | 39,3 | |||||
16/05/12 | Lugo – Patrimonio e Estradas | 39,15 | |||||
18/05/12 | Lugo – Deputación | 197,5 | |||||
05/02/12 | Santiago – Consorcio Galego e Begonte | 110,27 | |||||
? | Coruña e Lugo | 102 | |||||
13/06/12 | Lugo – Fomento | 72,15 | |||||
21/06/12 | Santiago – Consellería Medio Ambiente | 110,87 | |||||
29/06/12 | Ferrol – cerimonia Chilreu | 70,87 | |||||
09/05/12 | Madrid | 422,43 | |||||
29/05/12 | Lugo – Deputación | 39,4 | |||||
06/06/12 | Santiago – Vivenda | 113,67 | |||||
06/07/12 | Lugo – Otea | 38,15 | |||||
11/07/12 | Santiago – Consellería Presidencia | 110,27 | |||||
15/07/12 | Medina del Campo | 349,95 | |||||
18/07/12 | Santiago – Egap e Portos | 110,27 | |||||
25/07/12 | Santiago – medallas Castelao Rodrigo Maseda | 76,27 | |||||
31/07/12 | Lugo – presentación Feira do Bonito | 38,15 | |||||
10/08/12 | Lugo – Xunta e Deputación | 38,15 | |||||
13/08/12 | Lugo – Monsa | 38,15 | |||||
TOTAL | 5. 395,69 | ||||||