O PSOE explica que a Xunta só se lembra do Hospital da Costa nos debates, tras catro anos sen facer nada

José Ramón Val: “Feijóo só se lembra do Hospital da Costa nos debates, tras catro anos sen facer nada”

-O número tres da candidatura do PSdeG-PSOE por Lugo acudiu xunto co secretario xeral provincial, José Ramón Besteiro, e o candidato Ismael Rego a unha reunión cos sindicatos médicos, que lles transmitiron “unha situación moi preocupante, con pacientes que teñen que ser derivados a clínicas privadas”

O número tres da lista do PSdeG-PSOE por Lugo, José Ramón Val, acudiu esta mañá a unha reunión con representantes dos sindicatos médicos no Hospital da Costa, acompañado do secretario xeral da provincia, José Ramón Besteiro, e o candidato Ismael Rego. Val afirma que a situación que lles transmitiron é “moi preocupante, con pacientes que teñen que ser derivados a clínicas privadas de Lugo”. O socialista referiuse ademais ao debate de onte, no que Alberto Núñez Feijóo fixo mención do centro hospitalario para volver prometer a súa ampliación. “Sorprendentemente Feijóo só se lembra do Hospital da Costa cando chegan os debates electorais, cando leva case catro anos sen facer absolutamente nada”, censurou.

O candidato mariñán lembra que “hai un plan director aprobado e hai terreos, o que non hai é vontade política”. Outras das preocupacións que lles transmitiron os afectados na reunión son os horarios excesivos e acumulación de xornadas, co que a Xunta evita novas contratacións, a non cobertura de baixas laborais e “en definitiva, a continua diminución da calidade na sanidade pública”. Val, Besteiro e Rego visitaron ademais as casetas modulares prefabricadas instaladas no complexo na que atenden os pacientes de xeito provisional. “Isto é todo o que fixo o goberno do PP neste tempo, poñer unhas casetas que fan que a xente teña que ser atendida nunha situación precaria”, denuncia.