As razóns do Papa e os cartos de Musolini

Dimitiu o Papa de Roma, eu en ocasións anteriores xa falara do noxo do Papa ante a corrupción do clero, miles de casos de pederastia denunciados en todo o mundo, e os problemas para sanear e “blanquear” as contas da Banca Vaticana. Hoxe estas poderosas razóns poderían estar detrás da intención do Papa de renunciar ao cargo de xefe da Igrexa e do pequeno estado do Vaticano. ¡Pero ninguén esperaba que o fixese tan axiña!

Talvez a pinga que colmou a súa paciencia sexa ver a dous dos seus mais íntimos colaboradores, o mordomo Paolo Gabrielle e o banqueiro de Deus, Gotti Tedeschi, detidos e expulsados dos seus cargos en medio dunha guerra cocha entre as distintas faccións da Curia que non están de acordo coa política de transparencia do Papa alemán. Hoxe sabemos que, en realidade, o mordomo non foi un traidor ao Papa, senón todo o contrario: un peón dentro dunha gran partida de xadrez para frear a reforma da Banca Vaticana prometida por Ratzinger. ¡O mordomo sería o encargado do Papa para dar a coñecer ao mundo os manexos dunha parte da Curia romana para frear a citada reforma debido aos numerosos intereses en xogo!

Ao final, no medio desta guerra, xunto ao mordomo, caeu o obxectivo dos conspiranoicos, o director da Banca Vaticana, Gotti Tedeschi, un milanés, membro do Opus Dei, de honestidade probada, ao que o Papa encomendara limpar as contas do Estado Vaticano, pero as potencias escuras obrigáronlle a dimitir humillando, de paso, ao “santo pai”. Din que cando Gotti se foi de Roma, Ratzinger derramou as súas primeiras bágoas en moitos anos, pois era un home da súa confianza e un amigo fel. Isto deixoulle tocado e empezaría a tomarse moi en serio renunciar á cadeira de Pedro, algo insólito na Historia da Igrexa e que non se producía desde o S. XV. Así, pois, asistimos a un feito histórico que pouca xente viviu para contalo.

Por si todos estes problemas eran poucos, a semana pasada o xornal londinense, The Guardian, destapaba outro escándalo financeiro da Igrexa. Trataríase da compra de varios edificios luxosos na zona mais exclusiva de Londres, a zona de St.James, en 2006, ¡con diñeiro de Mussolini!. Si, como o leen. Segundo o xornal británico ese diñeiro foron uns 700 millóns de dólares que o Duce daría ao Papa Pío-XI a cambio de que a Igrexa “bendixese” o fascismo italiano. Como así fixo.

Alfonso Otero Regal