NN.XX. de Lugo reprocha a actitude e as “falacias” vertidas polo dirixente de Galiza Nova na Mariña

Lugo 27 de febreiro de 2013.- Novas Xeracións da provincia de Lugo a través do seu presidente, Daniel Vega, amosou o seu rexeitamento á actitude de falta de compromiso e as falacias vertidas polos dirixentes de Galiza Nova na Mariña.

O presidente provincial asegurou que feitos obxectivos e iniciativas promovidas polos populares contrapoñen a actitude dos populares de “compromiso e traballo” fronte a accións dos nacionalistas dirixidas simplemente ao “ataque e a mentira”, como veñen de poñer de manifesto coas declaracións vertidas en prensa en relación a NN.XX. de Barreiros.

O dirixente popular lamenta que mentres uns se centran en dar resposta aos mozos desempregados, sendo unha das máximas preocupacións de NN.XX., outros parecen esquecerse dos antecedentes que conlevaron esta situación.

Tras dúas lexislaturas de goberno socialista, compañeiros de goberno dos nacionalistas; España vive a crise económica, social e institucional máis grave a da súa historia recente, cunha taxa de desemprego xuvenil dramática.

Ante esta situación, NN.XX. traballou e ségueo a facer da man doutras organizacións e dos representantes en Parlamentos Autonómicos e Nacionais para conseguir articular instrumentos que freen a destrución do emprego xoven, apostando polo autoemprego e a formación como principais vías para a creación de emprego, estable e de calidade.

O presidente provincial Daniel Vega puxo como exemplo actual de traballo as reunións que está a manter xunto con OPA Galicia para tratar as inquietudes dos mozos autónomos.

Un goberno comprometido

“Aínda que semella que a moitos lles está a pesar, é un feito o compromiso do goberno nacional de Mariano Rajoy para inverter esta situación de desemprego e a súa aposta pola xuventude “, explica o mozo popular.

Polo tanto, Vega lembra de novo a creación dun Fondo Novo para impulsar o emprego xuvenil que se dotará con 6.000 millóns de euros “un éxito para España e o conxunto de Europa”, ao tempo que volve a manifestar a súa satisfacción pola batería de medidas enmarcadas dentro da Estratexia para ao Emprendemento e o Emprego dos Mozos.

Entre elas o popular citou unha serie delas dirixidas aos menores de 30 anos, como son unha tarifa plana á Seguridade Social de 50 euros, durante os seis primeiros meses; a compatibilidade por desemprego co inicio dunha actividade por conta propia; ou o feito de que mentres que a taxa de paro non se sitúe por debaixo do 15%; o Goberno Central prevé incentivar mediante a redución da cota da empresa á Seguridade Social. A estas medidas, Vega engádelle a contratación a tempo parcial con vinculación formativa para os menores de 30 anos ou a creación dunha modalidade de contrato temporal, “primeiro emprego para os mozos”, con incentivos a súa transformación en indefinido e outorgaranse incentivos ao contrato en prácticas para o primeiro emprego.

Polo tanto, os populares están a impulsar formulas para fomentar o emprego; e que os socialistas e os nacionalistas mentres tiveron responsabilidades de goberno non conseguiron levar a cabo con éxito.