Raquel Arias valorou co alcalde de Alfoz algunhas das actuacións que a Xunta desenvolve no concello

RAQUEL ARIAS AVALÍA CO ALCALDE DE ALFOZ OS AVANCES DOS PROXECTOS DE MELLORA DE INFRAESTRUTURAS VIARIAS E SANEAMENTO QUE SE REALIZAN NO CONCELLO

Lugo, 8 de febreiro de 2013.- A delegada territorial, Raquel Arias, reuniuse hoxe co alcalde de Alfoz, Emilio Lousas, para valorar algunhas das actuacións que está a desenvolver a Xunta no municipio.

Así, a delegada e o rexedor alfocense abordaron as actuacións que a Consellería de Presidencia financiou no municipio con cargo ao Fondo de Compensación Ambiental. Neste sentido, ámbolos dous representantes trataron sobre as obras de saneamento no núcleo de Couto de Abaixo, ademais da colaboración por parte do departamento autonómico nos gastos da recollida de lixo a través dunha subvención global de 58.000 euros.

Esta contía procede dun fondo posto en marcha polo actual Executivo galego, que sufraga actuacións con cargo ao canon eólico nos municipios que soportan este tipo de instalacións, o que permitiu que por primeira vez os concellos galegos se beneficien directamente da explotación de enerxía eólica en Galicia.

Así mesmo, Arias avaliou co rexedor que están próximas a rematar as obras do Programa Estratéxico de Infraestruturas no Medio Rural (Peim), que supón un investimento de máis de 53.000 euros por parte da Consellería do medio Rural e do Mar.

A través deste programa estanse mellorando 1,8 quilómetros de camiños e pistas de acceso a núcleos rurais. En concreto, os tramos sobre os que se actúa son os camiño de Rizal a Señorío e de Insua a Xogral, e os accesos a Acernadas e Sesín.