Burela acollerá dúas xornadas “En prol do Emprego – Encontros con Empresarios” este mércores e xoves

Burela, 5 de marzo de 2013. O salón de actos da antiga biblioteca acollerá mañá e o xoves dous actos programados En prol do emprego-Encontros con empresarios, que organiza a Concellería de Emprego e dirixidos a persoas que estean en buscando un traballo.

Mañá mércores, 6 de marzo, ás 10 da mañá terá lugar unha xornada sobre o sector socio-sanitario. “Unha das promotoras do Centro Clínico Ribadeo e a responsable de recursos humanos impartirán unha charla na que nos contarán cómo se constituíu a empresa, cal é o seu ámbito de actuación e os servizos que presa, qué postos de traballo existen e tamén nos informarán sobre o perfil dos traballadores que buscan: formación, experiencia, habilidades, etc. Despois haberá un coloquio e os/as asistentes poderán entregar directamente os seus currículos á empresa”, explican desde a Concellería de Emprego que dirixe José Casas.

O xoves, 7 de marzo, tamén ás 10 da mañá desenvolverase unha xornada sobre prestacións de desemprego, subsidio, RAI, plan Prepara e outras prestacións sociais. Neste caso impartirán as charlas o director de prestacións do Servicio Público de Empleo Estatal en Burela, Ramón Lourés Lamas, e a traballadora social do Concello de Burela, Mª Consuelo Cartoy Veiga. “Esta cita está especialmente dirixida a aqueles demandantes de emprego, con preferencia os inscritos na bolsa de emprego do Concello de Burela, que necesiten información de primeira man sobre as prestacións que poden solicitar mentres buscan emprego”.

Os interesados en asistir ás xornadas poden chamar ao seguinte número de teléfono: 982 58 16 30. O aforo está limitado a 35 participantes.