A plataforma contra os abusos eléctricos alégrase pola sentenza que obriga a Unión Fenosa a indemnizar ao Concello Cervo

A Plataforma de Afectados polos Abusos do Mercado Éléctrico felicita ao Concello de Cervo por esta sentenza xa que pon fin a outro abuso cometido por unha empresa do mercado eléctrico. “Este é un exemplo máis de que estas compañías campan ás súas anchas sen respectar as leis establecidas en busca do seu beneficio particular. Estas compañías aprovéitanse da súa posición de dominio no mercado para impoñer os seus intereses amparándose nos custosos procesos xudiciais como arma disuasoria fronte ao consumidor.

É importante que institucións como o Concello dean exemplo e demostren que os consumidores teñen dereitos e que a normativa deféndeos. Entendemos ademais que é a obrigación das corporacións municipais o facelo.
Xustamente unha das funcións máis importantes da Plataforma é, grazas a gran masa social que a apoia, denunciar publicamente nos medios de comunicación os numerosos atropelos que se producen neste sector e influír dentro da legalidade para que os organismos competentes resolvan favor do “peixe pequeno” e evitar que teña que acudir á vía xudicial. De feito observamos un xiro positivo nas actuacións da Consellería de Industria a cal xa resolve administrativamente a maioría dos problemas derivados na facturación eléctrica en lugar de desvialas aos órganos xurisdicionais, como facía antes.

Dende aquí queremos animar ao Concello a que siga facendo valer os seus dereitos e xa que logo os dos seus veciños e que, por unha banda, solicite a anulación de todas as facturas realizadas en base a consumos nas que non figuren lecturas e, doutra banda, que denuncie a substitución irregular dos contadores dos que o Concello é o titular xa que poñen en dúbida toda a facturación posterior a dita substitución, especialmente si non cumpren co regulamento de puntos de medida.

José Luis Moñita, presidente da plataforma