A feira Expomar abriu as súas portas en Burela para ensinar os avances tecnolóxicos en pesca e productos do mar ata o domingo

A feira monográfica Expomar abriu as súas portas este xoves na nave de redes en Burela. A inauguración correu a cargo da conselleira do Medio Rural e do Mar, Rosa Quintana. O alcalde, José Mª González Barcia, subliñou que desde Burela se ensinan ao mundo estes días os avances tecnolóxicos en materia de pesca.

O rexedor sinalou que “Burela convértese un ano máis na capital do mundo da pesca e da náutica de todo o norte peninsular. Burela aposta así de forma decidida polo mundo da pesca ao que Burela lle debe moito e ao que Burela nunca lle dará as costas”.

González Barcia dixo que “Expomar chega á súa décimo quinta edición en plenitude de facultades, tal e como demostra que a inmensa maioría dos expositores e das firmas que estiveron aquí en anos anteriores repiten a súa presenza en Burela. Esas firmas saben que Expomar non é só un bo escaparate para ensinar os últimos avances das distintas empresa en materia pesqueira, senón que é un perfecto campo para poder facer transaccións comerciais e iso é ao que se dedican as empresas”.

O alcalde burelés considera que “é para estar satisfeitos que un concello de 10.000 habitantes poida ter hoxe en día unha exposición da envergadura de Expomar, punteira para ensinar ao mundo os avances tecnolóxicos en materia de pesca e que nos fan sentirnos orgullosos. Ao mesmo tempo nos fan estar decididos na aposta pola continuidade dun sector básico para a nosa economía”. González Barcia reiterou que “nestes momentos que non son nada fáciles, nestes momentos nos que se está a negociar a nova política pesqueira común o Concello de Burela ten moi claro que o mundo do mar e da pesca ten futuro e que son os mesmos armadores e os mesmos mariñeiros os que saben perfectamente cómo teñen que facer para preservar os recursos, porque son eles os máis interesados en garantir o futuro da actividade. Só nos queda dicir que lles deixemos pescar para garantir a continuidade das empresas pesqueiras e dos postos de traballo, que nos tempos que corren son fundamentais para a nosa situación socioeconómica”.

A feira Expomar foi inaugurada pola conselleira do Medio Rural e do Mar, Rosa Quintana. Ao acto tamén asistiu a delegada territorial da Xunta en Lugo, Raquel Arias, entre outras autoridades. Paralelamente celébranse tamén en Burela as XX Xornadas Técnicas de Pesca e o XVI Encontro Empresarial de Organizacións Pesqueiras.