ACISA felicita ós gañadores do concurso gastronómico Ribadeo de Tapeo: La Solana, La Villa, O Tumbín e Bouza

Ribadeo, 30 de maio de 2013. ACISA felicita ós gañadores do concurso gastronómico Ribadeo de tapeo. Fai uns días dábase a coñecer o nome dos locais elixidos polo xurado coma os autores das mellores tapas deste 2013, que foron La Solana, La Villa e O Tumbín. E onte facíase pública a decisión do público que cos seus votos elixiu como a mellor tapa a proposta elaborada polo hotel Bouza.

A directiva da Asociación de Comerciantes, Industriais, Servizos e Autónomos de Ribadeo quere felicitar ós restaurantes La Solana, La Villa, O Tumbín e Bouza “porque as súas tapas foron elixidas coma as mellores da edición de 2013 do Ribadeo de tapeo. Estamos moi satisfeitos polo traballo que realizaron estes catro locais, que ademais son socios de ACISA. Trátase do recoñecemento á orixinalidade das súas creacións e ós sabores que souberon transmitir coas súas tapas”.

ACISA recorda que 40 dos 55 bares, mesóns e restaurantes que participaron no Ribadeo de tapeo son asociados, “a cita encheu de xente durante estes dez días os locais hostaleiros da localidade e das parroquias, algo que consideramos moi importante dados os tempos que nos tocaron vivir. Foron moitos os que participaron, pero so uns poucos pasaron á fase final na que despois se procedeu a elixir ós gañadores”. A directiva fai extensiva a súa felicitación a todos os participantes e a todos os finalistas: “o traballo ben feito sempre ten a súa recompensa”.

Desde a directiva de ACISA animan ós ribadenses a acudir á degustación gratuíta das tapas que ofrecerán mañá venres, 31 de maio, os locais gañadores.