Antonio Veiga entregou os I Premios ao baloncesto galego que outorga a revista Zona Press

Lugo, 28 de maio de 2013. O salón de actos do Pazo de San Marcos acolleu, esta tarde, a gala dos I Premios ao baloncesto galego que outorga a revista especializada neste deporte Zona Press. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, xunto co director da publicación deportiva, Óscar Losada, foi o encargado de entregar estes galardóns “que supoñen un recoñecemento ao traballo levado a cabo polos deportistas e técnicos galegos ao longo da tempada que vén de rematar”.

Nesta primeira edición, establecéronse seis categorías á hora de conceder os premios. O galardón ao mellor xogador galego recaeu en David Mouriz, do Amfiv Vigo; o de mellor xogadora galega foi para Arantxa Novo, do Universidade do País Vasco; o de mellor xogador dun equipo galego para Alberto Corbacho, do Obradoiro; o de mellor xogadora dun equipo galego para Ylenia Manzanares, do Cortegada, o premio ao mellor xogador estranxeiro dun equipo galego recaeu en Levon kendall, do Obradoiro, mentres que o galardón ao mellor técnico dun equipo galego foi para Moncho Fernández, que adestra ao Obradoiro. Así mesmo, tamén se otorgou un premio á traxectoria, que neste caso recaeu no ex xogador galego Fernando Romay.

Antonio Veiga congratulou ás galardoadas e aos galardoados, así como á propia publicación Zona Press “polo labor que desenvolve a nivel divulgativo a prol deste deporte” e amosou a súa satisfacción respecto a que esta gala do baloncesto galego, que se organiza por primeira vez, se celebrase na cidade de Lugo “por tratarse dunha cidade punteira en Galiza no eido do baloncesto dando cabida numerosos equipos de baloncesto de base tanto masculinos coma femininos” .

A proxección do documental Campioas Esquecidas, un traballo sobre o equipo feminino Medina de A Coruña, o primeiro conxunto galego que competiu nunha Copa de Europa en calquera modalidade deportiva de equipo, facéndoo antes ca unha escuadra masculina, serviu como broche final a esta gala dos I Premios ao baloncesto galego.

Neste senso, o vicepresidente do ente provincial recordou que “un dos principais obxectivos da área de Deporte da Deputación de Lugo é a promoción da igualdade en todas as disciplinas deportivas” e destacou que “hoxe en día, o baloncesto é un dos deportes que máis presenza feminina ten no que se refire tanto aos equipos como ás súas directivas”.