Lugo, 8 de maio de 2013. O alcalde de Burela e presidente da Fundación Expomar, José María González Barcia, afirmou hoxe que “Expomar como feira está confirmada como referente nas innovacións tecnolóxicas en materia de pesca no norte de España”.
González Barcia fixo esta afirmación durante a rolda de prensa de presentación da XV edición da Feira Monográfica Náutico Pesqueira Expomar, que se celebrará na nave de redes do porto de Burela os días 23, 24, 25 e 26 do presente mes de maio.
O alcalde burelés, que lembrou que a feira como tal comezou a realizarse en 1994, e que ten carácter bianual desde 2007, considera “altamente positivo que na situación actual de crise económica contemos a estas alturas con máis firmas e máis expositores que hai dous anos; isto demostra que temos un recoñecemento sobresaínte entre o sector”.
O presidente da Fundación Expomar asegurou que “a feira demostra o dinamismo do sector pesqueiro, clave non só para a economía local e mariñá, senón para a economía provincial. Non podemos esquecer que ABSA en Burela e Porto de Celeiro son dous puntais económicos fundamentais cun enorme valor engadido”.
González Barcia manifestou que “se algo caracteriza a Expomar, é a aposta polos avances tecnolóxicos. Esta feira é o mellor escaparate que hai no norte de España para coñecer e avaliar os avances tecnolóxicos aplicados ó mundo da pesca e coñecer e avaliar a aplicación das novas tecnoloxías á actividade pesqueira”.
González Barcia fixo un recoñecemento e agradecemento públicos ó traballo e aportacións feitas polos membros do Padroado da Fundación Expomar, organizadora do evento: Confraría de Pescadores, Armadores de Burela, Concello de Burela, Armón…. “Con especial mención para astilleros Armón, que este ano celebran o seu cincuenta aniversario, na convicción que o fan coa mesma ilusión coa que arrancaron a súa actividade e, o que é o máis importante, con carga de traballo presente e futura. Quero destacar a sempre desinteresada colaboración de Armón coa Fundación EXPOMAR, con lembranza significativa para a edición de 2006”.
O alcalde burelés e presidente da Fundación Expomar indicou que “a feira tense convertido nun dos foros de debate máis interesantes dentro do mundo da pesca. As Xornadas Técnicas e os Encontros Profesionais son dous instrumentos fundamentais para potenciar ese debate sobre os problemas do sector pesqueiro, o estado dos recursos, as cotas, a Política Pesqueira Común, as tripulacións mínimas, etc. Serven de punto de encontro entre as administracións con competencias en materia pesqueira e o sector. As súas conclusións son analizadas e tamén en boa parte tomadas en consideración á hora de deseñar as estratexias en materia de política pesqueira”.
Barcia asegurou que “nesta edición, estou seguro que os debates tamén serán frutíferos e positivos, porque hai asuntos moi importantes sobre da mesa e das solucións que se apliquen dependerá en boa medida a saúde do sector. Un sector que nestes momentos ten claro, e nós desde o Concello e desde a Fundación tamén, que hai que manter os postos de traballo e as empresas pesqueiras. Persoalmente entendo que non é o momento de grandes cambios senón de deixar pescar, iso si, respectando as pautas legalmente establecidas, pero sen chegar a situacións de extrema rixidez”.
José María González Barcia agradeceu a presenza do Subdelegado do Goberno, da Delegada da Xunta e doutros representantes institucionais, así como dos membros do Padroado da Fundación Expomar presentes na rolda de prensa. E destacou “a colaboración técnica e económica fundamental da Consellería de Medio Rural e Mar. A súa titular, Rosa Quintana, coñece perfectamente o que facemos e como o facemos, e sei da súa implicación con Expomar. Quero agradecerlle a súa achega decidida e decisiva ó noso proxecto”.
Tamén agradeceu a achega doutras institucións e entidades a Expomar, e lembrou que o Concello burelés aporta todos os anos, haxa ou non haxa feira, doce mil euros á Fundación.
Finalmente, animou ós lucenses a acudir a Burela os días 23, 24, 25 e 26 de maio, “aínda que antes teñen unha dobre cita este sábado, día once; unha, durante todo o día na nave de redes co encontro anual de palilleiras e encaixeiras de toda Galicia, un evento coorganizado pola Fundación EXPOMAR e que cada ano acolle máis participantes e visitantes. E unha segunda cita, tamén o sábado, ás oito da tarde, no Pavillón Vista Alegre, xa que as rapazas do Burela Fútbol Sala feminino estou seguro que serán campioas da liga de división de honor nacional; agora xa o son moralmente, pero o sábado seguro que marcarán esa data con letras de ouro no deporte burelés, no lucense e no galego. Campioas xa, si ou si, a deixarse a pel na cancha. Contan co ánimo e empuxe de todos”.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.
