O XIV Encontro Empresarial de Organizacións Pesqueiras asegura que os stocks foron recuperados

As asociacións pesqueiras, reunidas no marco do XIV Encontro Empresarial de Organizacións Pesqueiras co amparo da Fundación Expomar, apelan á responsabilidade dos representantes políticos, en especial aos do Parlamento Europeo, para que teñan en conta a situación dos stocks e as pesqueiras e necesidades dos homes e mulleres do sector pesqueiro, mantendo o equilibrio entre os aspectos medioambientais e sociais e económicos.

Así mesmo, desexan lanzar unha mensaxe de tranquilidade e optimismo á cidadanía en relación ao estado dos stocks pesqueiros; xa que, “pese ás catastróficas e apocalípticas afirmacións de certos grupos medioambientais, moitas das especies pesqueiras ás que se dirixe a flota representada polas nosas asociacións se atopa, segundo opinión científica, en niveis de RMS, e a práctica totalidade dentro dos límites biolóxicos de seguridade, en camiño cara o RMS. De feito a constatación diaria dos nosos mariñeiros na mar, que sempre foi ratificada posteriormente polos propios científicos, nos mostra que a situación é aínda mellor”.

Dende as asociacións engaden que “pese a iso, por parte das organizacións medioambientais de forma interesada queren trasladar unha definición sesgada do termo sostibilidade, facendo dubidar aos cidadáns sobre a situación real dos stocks. Trátase de modificar, amoldar e acomodar a realidade aos seus intereses, en moitos casos moi lonxe da protección do medio ambiente que pregonan”.

As asociacións pesqueiras, lamentan que “desgraciadamente estas entidades asumiran un peso moi importante no ámbito da Política Común de Pesca, sendo capaces de impoñer as súas opinións no desenvolvemento da súa reforma. E fano dunha forma non directa, exercendo presións de lobby que fan que as propostas presentadas pola Comisión Europea máis parezan feitas por elas mesmas que pola Comisaria de Pesca.

Fronte a isto, “pese á nosa situación en relación cos recursos segundo o exposto anteriormente, e ao feito comprobado de ser unha actividade extensamente regulada -xa que máis de 1.000 disposicións nos atanen- e controlada, ata agora non fomos capaces de trasladar aos órganos decisorios e á opinión pública, a realidade e a especial incidencia socio-económica do sector pesqueiro nas zonas costeiras do noso país”, afirman.

Polo tanto, critican que “o sistema de toma de decisións na Unión Europea fai que teña máis voz, polo menos se teñan máis en conta as opinións e ideas preconcibidas das organizacións medioambientais, que a realidade da pesca. Pese a ter con nos a razón, nos vemos con moitas dificultades para facela valer, precisamente polo traballo organizado destes grupos de presión que distorsionan a realidade”.

Finalmente, conclúen argumentando que “o sector pesqueiro é tamén parte da sociedade civil: os homes e mulleres que viven da pesca non poden ser obviados na toma de decisións para a xestión da súa actividade. Somos os máis interesados no futuro da pesca e para iso fixemos os esforzos e axustes que permitiron que se recuperen os stocks, pese a que moitos neguen esa realidade”.