A Xunta afirma que a dotación de persoal dos centros de saúde de Cervo e San Cibrao garante unha atención de calidade

Lugo, 27 de xuño de 2013.- A dotación de persoal dos centros de saúde de Cervo e San Cibrao garante unha atención sanitaria de calidade neste municipio, nas mesmas condicións que ata o de agora, xa que o incremento do número de tarxetas sanitarias por profesional non debe supor unha carga de traballo substancialmente maior que a que tiñan ata o de agora.

Cada profesional médico deste concello ten, trala reorganización, unha media de 1.233 cartillas asignadas, ratio que mellora ao da maioría dos concellos da provincia, de Galicia e de España, así como a ratio considerada óptima polas sociedades científicas, que se sitúa nunha media de 1.500 tarxetas sanitarias por profesional.

Polo tanto, a carga de traballo dos tres profesionais médicos do concello de Cervo é óptima, xusta, equitativa e segue a garantir unha asistencia de calidade. Neste senso, o Sergas recalca que ninguén vai ser atendido en peores condicións, nin quedar sen unha asistencia sanitaria pública e de calidade.

O Servizo Galego de Saúde insiste, unha vez máis, en que a reorganización asistencial levada a cabo neste concello só busca optimizar o emprego dos recursos humanos do sistema de saúde público, baseándose en criterios obxectivos que obrigan a destinar ditos recursos a servizos donde son máis necesarios para a poboación.

Criterios obxectivos como poboación (envellecemento, dispersión…) xustifican a reorganización adoptada. De feito, no que atinxe ao envellecemento da poboación, dicir que, segundo os últimos datos do Instituto Nacional de Estadística (relativos ao ano 2012), o concello de Cervo ocupa o segundo lugar coa poboación menos envellecida da comarca de A Mariña, despois de Burela. Así, Cervo conta cun 21,8% de poboación maior de 65 anos, sendo, como apuntamos, o segundo concello mariñano coa poboación máis xove. No que se refire á dispersión xeográfica, Cervo tamén figura entre os concellos con menor dispersión (57,7 habitantes por kilómetro cadrado), só superado por Burela, Foz, Ribadeo e Viveiro.

Por outra banda, dicir que nos últimos días o Servizo Galego de Saúde detectou unha organización incorrecta das axendas nos centros de saúde de Cervo e San Cibrao, que xa se correxiu, polo que ditos dispositivos asistenciais non teñen lista de espera e, a día de hoxe, había ocos libres nas axendas de citación dos tres facultativos.