Cervo realizará reformas na piscina municipal de Lieiro que estarán rematadas a finais do verán

Cervo, 12 de xullo de 2013-O Concello de Cervo acometerá un proxecto de mellora da eficiencia enerxética na piscina olímpica municipal de Lieiro e que incluirá a execución de obras de calado en diferentes partes da instalación deportiva que permitirán reducir o consumo de enerxía. En concreto, o proxecto inclúe a reparación da cuberta e a reposición do canalón co obxectivo de eliminar as filtracións e as humidades. Ademais, vanse reparar as portas de acceso e vaise mellorar o sistema de quecemento da auga.

Con este conxunto de obras, que estarán rematadas previsiblemente a finais do verán, o Concello pretende que a piscina sexa, por unha banda máis hermética, de forma que se manteña a temperatura necesaria utilizando menos recursos, e por outra que o quecemento da instalación a través de calefacción, climatización e produción de auga quente implique un menor gasto. Deste xeito, poderanse reducir os custos de mantemento que supón para as arcas municipais esta piscina olímpica. Pero ao mesmo tempo, este proxecto beneficiará aos usuarios da piscina, xa que se lles ofrecerá un maior benestar e comodidade, o que tamén contribuirá a potenciar aínda máis esta instalación deportiva.

Cabe destacar que estas obras teñen un orzamento de 27.100 euros que serán financiados pola Xunta de Galicia a través dunha subvención que xa foi concedida.

O edil de Deportes, Luis Guillén, manifestou estar moi “satisfeito de poder levar a cabo estas obras que mellorarán notablemente a calidade do servizo que se presta na piscina olímpica municipal” e que ao mesmo tempo “permitirán diminuír o consumo enerxético e gastos e, en consecuencia, ser máis respectuosos co medio ambiente”. Unha instalación deportiva que ten trece anos de antigüidade e que despois deste tempo precisa destas importantes reformas que permitan optimizar o seu funcionamento.