Comezan as obras no pavillón dos institutos de Burela

Burela, 12 de xullo de 2013. O Concello acomete estes días unha obra no pavillón dos institutos, onde se está a substituír o caneiro das augas pluviais. Segundo explica o concelleiro de Obras, Manuel Fernández Valle, “o vello estaba roto e moi deteriorado pola corrosión, incluso nalgúns puntos non existía, o que estaba a provocar que auga se filtrase ao interior do edificio” e engadiu que “esta situación víñase arrastrando desde hai anos. A obra faise agora que temos mellor tempo e porque tamén hai menos afluencia de usuarios a esa zona e non queremos que estes traballos supuxesen un perigo para eles”.

O edil popular dixo que “chegamos a un acordo cos dous institutos para financiar estes traballos que eran tan necesarios. O Concello aporta o 50% do investimento, e cada instituto un 25%. O montante ascende a 4.000 euros máis IVE. Desde o equipo de goberno seguimos a establecer diversas colaboracións para poder acometer este tipo de obras”.
Os traballos de colocación do novo caneiro de augas pluviais, que é de aceiro inoxidable, rematarán a principios da vindeira semana.