O BNG considera que o Franquismo volve aos Plenos de Barreiros ao impedirse neles o debate de cuestións xerais

Barreiros, 6 de agosto de 2013. O pleno deste luns en Barreiros deixou noticias sorprendentes. Segundo anunciou o Alcalde na propia sesión, “a partir dese momento non se debaterá en Barreiros ningunha moción que non teña que ver exclusivamente con Barreiros”. Segundo o BNG, esta decisión supón “un auténtico atentado contra a calidade democrática no noso concello, xa que o pleno municipal, como institución máis próxima á cidadanía é onde se teñen que debater todos os temas que calquera dos grupos municipais consideren de interese.” Esta decisión súmase, segundo o BNG, a “actitudes claramente pouco democráticas que está tendo Alfonso Fuente nos últimos tempos, como o feito de deixar sen contestar as preguntas que se lle formulan verbalmente nas sesións ou a desatención dos requirimentos de documentación feitos formalmente por rexistro. Parece que o Partido Popular no seu conxunto está quitando a careta e cada vez teñen máis nostalxia do franquismo”, sinalaron en referencia a esta cuestión e a que “en Barreiros non existe grupo de goberno, xa que o único que decide e manda é o Alcalde e o resto de concelleiras e concelleiros do PP non pintan nada” e ás declaracións do Alcalde de Baralla que non foron censuradas polo seu partido.

Pero ademais desta valoración, desde o BNG de Barreiros consideran que con “esta decisión o alcalde barreirense está renunciando a defender os intereses xerais das veciñas e veciños de Barreiros fronte a políticas que poidan vir determinadas pola Xunta de Galiza ou o Goberno do Estado aínda que perxudiquen á cidadanía.” Os nacionalistas sinalan como exemplo cuestións como “decisións de recortes que poidan afectar á sanidade, á xustiza, etc. que non afectan directamente a ningún servizo que se presta en Barreiros; pero si recortan a calidade dos mesmos que reciben as e os barreirenses.” Polo tanto, os nacionalistas de Barreiros consideran que, con este tipo de decisións, “está claro a que intereses responde o Alcalde de Barreiros: antepón a disciplina de partido e a defensa das decisións que tomen os gobernos galego ou español do Partido Popular á defensa dos intereses da xente.”

O Alcalde incrementa o prezo do servizo de axuda no fogar para as persoas usuarias ao que a Xunta de Galiza aporta 0€. Os nacionalistas votaron en contra da modificación da ordenanza que o regula por esta cuestión. Os nacionalistas barreirenses votaron no pleno deste luns en contra da modificación da ordenanza que regula a prestación do Servizo de Axuda no Fogar e que supón unha nova suba deste servizo para as persoas usuarias. Para o BNG “esta ordenanza, que segundo se nos explicou é unha adaptación do Decreto aprobado pola Xunta de Galiza mediante o cal o goberno galego se desatende deste servizo, é un novo ataque ás persoas pensionistas de Barreiros que verán, por segunda vez en menos de dous anos, como se incrementa o prezo que teñen que abonar por este servizo”.

Segundo o BNG de Barreiros, Alfonso Fuente “está instalado na mentira e nas escusas para defender as decisións da Xunta e, neste sentido, non dubida en mentir descaradamente dicindo que a Deputación de Lugo non aporta nada para o Servizo de Axuda no Fogar, cando a única axuda que recibe o concello de Barreiros para este servizo é, precisamente a do ente provincial. Pola contra, tras a insistencia do grupo municipal do BNG onte no pleno, tivo que recoñecer que é a Xunta de Galiza quen aporta 0€ para o servizo de axuda no fogar básico e que a aportación da Deputación Provincial a Barreiros está por riba da media do resto de concellos da provincia”.

Os nacionalistas insisten na valoración que xa fixeron cando no ano 2011 o PP en Barreiros incrementou o prezo deste servizo e conclúen que “o Partido Popular desenténdese dos servizos sociais e o concello de Barreiros súbelle o prezo ás persoas usuarias para tapar os recortes da Xunta de Galiza. Polo tanto, unha vez máis, vemos cales son as prioridades deste alcalde: defender as medidas e decisións do Partido Popular, aínda que con iso perxudique ás veciñas e veciños de Barreiros”.