Emigrantes retornados da Mariña continúan a campaña informativa sobre as sancións do goberno ao colectivo

A Mariña, 12 de setembro de 2013. Emigrantes da comarca afectados polos expedientes sancionadores iniciados pola Axencia Tributaria Española por non declarar as pensións recibidas desde outros países desde 2008, constituíron onte a xestora do Colectivo de Emigrantes Retornados da Mariña.

Esta xestora, que estará formada por 5 persoas, Moncho Pena, Lionel Rexes, Luis Cabrera, José Fraga e Gonzalo Villarmea, e na que non se descartan novas incorporacións, iniciará os traballos de defensa dos dereitos dos afectados e afectadas polo que consideran unha ‘estafa perpetrada polo Goberno do Estado español’, o vindeiro mércores, cunha xuntanza para impulsar os acordos e propostas definidos na asemblea de onte.

Continuar informando a moita xente que descoñece que está afectada
O Colectivo de Emigrantes Retornados da Mariña continuará coa campaña informativa dirixida por unha banda a dar a coñecer a toda sociedade da comarca esta problemática que afecta a centos de veciñas e veciños, e por outra parte para informar a moitos emigrantes retornados que poden estar afectados e que aínda non o saben. Neste senso, desde o Colectivo, confírmase que nas vindeiras semanas está previsto convocar xuntanzas en concellos como Mondoñedo, Riotorto e o Valadouro que se repetirán noutros municipios. Ademais, estes encontros complementaranse con outro material informativos que se repartirá nos concellos da comarca

Recollida de sinaturas para demandar da Axencia Tributaria un cambio de postura
Outra das accións acordadas na asemblea de onte polo Colectivo de Emigrantes Retornados da Mariña é a recollida de firmas entre os mariñáns para instar ao Goberno central, concretamente á Axencia Tributaria, a que paralice os expedientes sancionadores iniciados contra estes emigrantes e a que anule as sancións xa impostas que, nalgúns casos superan os 30.000 euros. “A xente síntese estafada por Facenda que mal informou cando quixeron tributar polas súas pensións do estranxeiro e recomendoulles non facelo paras agora esixirnos todo de golpe”. Non é xusto que a nós, querendo tributar se nos trate como defraudadores e a outros que evadiron grandes capitais sabendo o que facían se lles premie con amnistías fiscais.”

Queremos contribuír, xa o fixemos durante moitos anos enviando divisas, pero queremos un trato xusto e non puñaladas polas costas
Esta situación está a provocar que algúns dos afectados e afectadas incluso sopesen volver aos países aos que emigraron hai décadas en canto se sinten dobremente enganados porque foron mal informados pola administración pública estatal que lles asegurou que non era necesario declarar as pensións que percibían do estranxeiro; outro aspecto que confirma a falla de vontade e intencionalidade dos emigrantes retornados de defraudar a facenda.

Este asunto evidencia, ademais, a diferenza de trato do Goberno central cos evasores que deliberadamente estafan á facenda pública e coa xente honrada á que agora se lle pretenden espoliar os seus aforros a consecuencia dun cambio lexislativo do que non se lles informou.

O colectivo acordou, tamén, reunirse con representantes dos grupos políticos dos concellos da comarca para valorar a posibilidade de presentar mocións que incidan na defensa dos intereses dos e das emigrantes retornados.