O PP de Lourenzá esixe medidas urxentes para garantir a seguridade dos veciños no entorno do Cantón “ante o risco de caída das polas das árbores”

Os concelleiros do PP instan ao goberno socialista a “adoptar medidas de prevención” como o precinto do entorno de forma urxente e un estudo, por parte de persoal experto, sobre a afectación das árbores para valorar o seu estado e o tratamento que sexa necesario adoptar

Lourenzá, 25 de xuño de 2025. O PP de Lourenzá esixe medidas para garantir a seguridade dos veciños e veciñas no entorno do Cantón.

Tralo desprendemento dunha rama dun dos plátanos de considerable magnitude e peso, os concelleiros do PP laurentino amosan a súa preocupación polo risco que supón para os veciños e veciñas e advirten da necesidade de adoptar medidas de forma urxente.

Os concelleiros do PP xa advertiran en Pleno da situación das árbores enfermas e “os prexuízos polas podas realizadas a destempo”.

Á vista do desprendemento dunha rama, os populares instan ao goberno socialista a “adoptar medidas de prevención” como o precinto do entorno de forma urxente e un estudo, por parte de persoal experto, sobre a afectación das árbores para valorar o seu estado e o tratamento que sexa necesario adoptar.