O plan Satelíz@TE, posto en marcha pola Deputación de Lugo, rexistrou máis de 450 solicitudes feitas por veciños, asociacións e PEMES do rural da provincia, para optar a este plan co que a institución provincial permitiralles contar con conexión vía satélite de xeito gratuíto. Os demandantes non contaban con cobertura de internet por residir nas chamadas “zonas de sombra” o que dificultaba que negocios e particulares lle tiraran partido ás novas tecnoloxías.
Segundo destacou Gómez Besteiro, na Deputación de Lugo “estamos moi satisfeitos coa marcha do Satelíz@te, porque exemplifica a liña na que queremos seguir traballando: estendendo o uso das novas tecnoloxías na provincia, mellorando a calidade de vida dos nosos veciños e fortalecendo o tecido empresarial”, co fin de crear emprego e fixar poboación no rural.
O elevado número de solicitudes da conta da necesidade do plan. Con esta iniciativa da Deputación, serán centos de familias e empresas lucenses afincadas no rural as que poderán contar cun servizo de Internet realmente operativo, posto que ata o de agora estes estaban pagando por un servizo do que non dispoñían realmente. O Satelíz@te permitiralles facer compras, realizar trámites administrativos dun xeito rápido e sinxelo e acceder a todo todo tipo de información cunha conexión rápida e fiable.
Lugo, Terra Chá e Mariña á cabeza
De todas as solicitudes presentadas ata o momento destacan especialmente o número procedente da comarca de Lugo, cun total de 142, tan só das parroquias do concello de Lugo se achegaron 75 solicitudes. Tamén é considerable o número de interesados que formalizaron a súa inscrición dende a Terra Chá, 87, ou a Mariña, 66. Por concellos destaca ademais de Lugo, Palas de Rei con 56 solicitudes, Cospeito con 35 e as 18 de Friol, 19 do Valadouro e Outeiro de Rei e as 22 de Xove.
Financiamento ó 100%
Cada beneficiario do programa Sateliz@te, que conta cun orzamento total de 385.000 euros, recibirá unha axuda que cubrirá o 100% do custe da antena, a súa instalación e os equipamentos precisos para a conexión á rede de banda longa, como pode ser un router. A contía máxima de cada subvención será de 500 euros. O usuario deberá asumir despois o mantemento do servizo, aínda que a Deputación garantirá tarifas vantaxosas, pois pactou os prezos de subministro coas operadoras de telecomunicacións. A velocidade de Internet da que dispoñerán será dun mínimo de 2 Mb, mentres que o máximo dependerá do tipo de contrato que o usuario formalice coas empresas colaboradoras coas que contará a institución luguesa, aínda que podería chegar ós 20 Mb.
Nos vindeiros días estudarase a documentación presentada polos solicitantes e se está todo correcto coñeceranse os beneficiarios antes de que remate o mes para así poder realizar a instalación entre os meses de outubro e novembro e que os inscritos comecen a desfrutar de internet de calidade canto antes.
Un total de 32 participantes déronse encontro nesta segunda edición, demostrando o seu nivel e desfrutando dunha mañá de competición e compañeirismo. Os gañadores das diferentes categorías foron: Antón Pernas (Sub 8), David Bustabad (Sub 10), Xulio Pernas (Sub 12), Deivid Pérez (Sub 14), Manuel Castro (Sub 16) e Breixo Alvite (Sub 18). A alcaldesa de Cervo, Dolores García Caramés, entregou os trofeos e medallas aos vencedores. O Concello felicita a todas as persoas participantes polo seu esforzo e por contribuír ao crecemento do xadrez no municipio, reafirmando a súa aposta polo deporte, pola participación e por ofrecer novas oportunidades para gozar e aprender.
A proba , organizada polo Club Ciclista Viveiro, reuniu máis de 130 ciclistas e coroou as campioas galegas de todas as categorías femininas -desde infantil ata master-, e aos campions galegos de infantil e cadete. A Praza da Galeguidade acolleu a saída e meta da competición, que se desenvolveu nun circuíto estático de 18,9 quilómetros pasando polo Porto da Gañidoira, a 699 metros de altura.
Trátase de dous MG ZS Hybrid+ Comfort, equipados coa tecnoloxía híbrida autorrecargable Hybrid+, que permite combinar eficiencia e un menor consumo no uso habitual. Segundo os datos do fabricante para este modelo, presenta unhas emisións de entre 113 e 115 g/km de CO₂ e un consumo de combustible de entre 5 e 5,1 litros aos 100 quilómetros, segundo o ciclo WLTP. A adquisición supuxo un investimento de 51.848,50 euros, IVE incluído, financiado a través do Fondo de Compensación Ambiental correspondente ao ano 2026.
Contou con arredor de 90 expositores provintes de todos os puntos tanto de Galicia coma do resto de España e de varias partes do mundo, que exhibiron as súas pezas de tornería en madeira. Tamén acolleu a XVIII edición da Exposición CONtornos. Entre os participantes, destacou a presencia dun expositor provinte da cidade arxentina de Córdoba, así coma outros de Reino Unido, Francia e Portugal. Ata o domingo achegaronse a esta mostra internacional uns 5.000 visitantes, principalmente provintes de toda Galicia e tamén de Portugal.
O horario será o seguinte: Martes, 20 de outubro: de 9:00 a 13:30 horas e de 15:15 a 18:00 horas. Mércores, 21 de outubro: de 9:00 a 13:30 horas. As persoas interesadas poden solicitar cita previa a través do teléfono 981 92 80 80 ou da páxina web 
A competición celebrarase entre o 24 e o 27 de setembro en Las Vegas, e Julia Cabarcos emprenderá esta mesma tarde a viaxe cara aos Estados Unidos para afrontar a súa participación na categoría Women's Physique.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
