Soto sobre Llano: “Canto máis fala, máis entendemos por que xa non é alcalde de Burela”

Cervo, 14 de setembro de 2013-O edil de Zona Rural, José Ramón Soto, asegura que “canto máis fala Alfredo Llano, máis fácil é entender por que xa non é alcalde de Burela”. Soto explica que Llano bótalle a culpa ao Goberno central da supresión, hai anos, da Internet en cinco telecentros rurais de Cervo, “pero esquece que se produciu na época de Zapatero”.

O edil lembra que foi no 2009 cando a Deputación lle comunicou ao Concello de Cervo que deixaba de pagar a conexión á Internet dos telecentros de Gondrás, San Román, Rúa, Trasbar e Castelo. “Todo o mundo sabe, menos o señor Llano, que nese ano o PSOE gobernaba tanto na Deputación como no Estado” engade Soto. “A quen lle botan a culpa agora?”, pregúntase Soto.

De todos os xeitos, o edil de Zona Rural considera que é dunha “torpeza habitual entre os socialistas” a de saír a criticar “dándolle a volta á realidade e ocultando a verdade”. Aínda así, o edil considera que o importante é que “a Deputación decidiu non seguir pagando a conexión a Internet destes telecentros, negándolles coma sempre, os servizos básicos aos veciños e poñendo atrancos para que a poboación do rural tivese acceso á Internet”.