Equiouro 2013, organizada por APREVAL, acolleu a final do XV Campionato Galego de Andadura e do VI de cabalos trotóns e de andadura

O Valadouro, 14 de setembro de 2013. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, participou na entrega de premios aos vencedores e participantes nas carreiras de cabalos de andadura “Equiouro 2013”, unha xornada hípica organizada por APREVAL (Asociación de Promoción e Recuperación Ecuestre Val do Ouro) en Ferreira do Valadouro, nas que se disputaban a final do XV Campionato Galego de Andadura, de dous e catro tempos, así como a final do VI Campionato Galego de cabalos trotóns de andadura.

A xornada matinal completouse co concurso morfolóxico “Copa Galicia PRG 2012” de cabalos e eguas de pura raza galega, e cunha actividade didáctica e formativa de achegamento ao mundo animal dirixida aos máis pequenos, impartida pola Escola Infantil de monta en ponis e que se prolongará durante todo o día.

Durante a tarde está previsto que se dispute o concurso de andadura de cabalos cruzados, de dous e catro tempos; o de andadura de cabalos cruzados de trotón, de dous e catro tempos; o de andadura de cabalos trotóns, o de andadura de potros ata dous anos de todas as razas, e, como novidade este ano, incorpórase a carreira de cabalos en sulky. Xa pola noite, terá lugar a II Carreira nocturna de cabalos de andadura aparexados, que porá o broche a esta xornada ecuestre.

Todas estas actividades organizadas no marco de “Equiouro 2013” celébranse na pista de andadura ecuestre da que dispón a localidade, un proxecto, de recente construcción, que contou coa colaboración da Vicepresidencia da Deputación.

Neste sentido Antonio Veiga explicou que “estas actividades ecuestres supoñen alternativas de ocio de grande interese, coas que se dinamiza o turismo e a actividade económica da localidade. Por iso, desde a Área de Benestar Social e Deporte da Deputación cremos que o Valadouro é merecedor desta pista de andadura ecuestre, pois ten máis que demostrada a súa afección aos cabalos”, puntualizou o vicepresidente do ente provincial.