O Concello de Riotorto asumirá o copago dos medicamentos de dispensación hospitalaria para os veciños e veciñas do municipio con patoloxías graves ou crónicas

Riotorto, 4 de outubro de 2013. O Concello de Riotorto asumirá o copago dos medicamentos de dispensación hospitalaria para veciños e veciñas do municipio suxeitos a tratamentos de leucemia, cancro de mama e ril, tumores cerebrais e hepatite C así como doutras patoloxías afectadas pola aprobación da resolución do Goberno do Estado do 10 de setembro e publicada no Boletín Oficial do Estado do día 18 do mesmo mes pola que fixa a obrigatoriedade da achega dos usuarios e usuarias para máis de 157 prestacións farmacolóxicas. Así o anunciou o alcalde da vila, o nacionalista Federico Gutiérrez Estoa, quen tildou a súa decisión de medida “necesaria e xusta fronte á discriminación acometida polo Partido Popular cara persoas vulnerábeis. O que buscamos desde o Concello de Riotorto con esta decisión é evitar que moitos pacientes abandonen o seu tratamento por razón económicas.”

Segundo explicou Gutiérrez Estoa “o obxectivo é que ningún veciño ou veciña da vila quede sen o tratamento axeitado por cuestión de cartos. Entendemos que un alcalde debe estar para máis cousas que bachear camiños e estradas e colocar farolas e por iso queremos garantir a universalidade ao acceso aos servizos de saúde. Se o Goberno central non está disposto a derrogar dita resolución discriminatoria, inxusta e que ataca dereitos básicos do pobo, e a Xunta de Galiza segue na súa teima de aceptar esta política e que entre en vigor a finais de ano, o Concello de Riotorto exprimirá ao máximo as arcas municipais, xa debilitadas, para garantir o acceso dos nosos veciños e veciñas aos servizos sanitarios.”

Poderán beneficiarse desta medida aquelas persoas que leven máis de 6 meses empadroados en Riotorto e, en función da renda do enfermo ou enferma, o Concello asumirá ben unha porcentaxe do copago ou o cento por cento do mesmo.

“Os nacionalistas de Riotorto – precisou o rexedor municipal- non permitiremos que a tendencia privatizadora do Partido Popular afecte á saúde dos nosos veciños e veciñas. Cobrar medicamentos como Afinitor ou Tyverd empregados en casos de cancro de mama, ou Votrient ou Temodal para o tratamento do cancro de ril e tumores cerebrais respectivamente, así como por outras mediacións contra enfermidades como a leucemia mieloide crónica, contra tumores malignos resecábeis e/ou metastásicos do estroma gastrointestinal, a artrite reumatoide, a dexeneración macular ou a hepatite C crónica, así como por até 157 prestacións farmacolóxicas de pouco máis de 50 medicamentos prescritos para casos de enfermidades consideradas graves ou crónicas e limitados a pacientes ambulatorios das farmacias hospitalarias, supón cruzar todas as liñas vermellas da sanidade e da política en xeral.”

Desde Riotorto lamentan que “as decisións que o Partido Popular está aprobando en materia sanitaria vaian máis aló de consideracións ideolóxicas e sobrepasen a fronteira da ética e da moral. Os populares queren facer da sanidade pública un artículo de luxo digno só para os petos máis abundantes; non entenden que o dereito á sanidade pública e gratuíta non admite discriminacións nin pode ser unha moda nin algo pasaxeiro. Tras estes medicamentos polos que os gobernos estatal e galego pretenden cobrar hai milleiros de historias terribles e o único que fan con este tipo de políticas é situalas ao borde da exclusión sanitaria e social, xa que moitos dos afectados e afectadas teñen xa unha situación económica mermada pola súa enfermidade.”

Federico Gutiérrez Estoa anima a todos os alcades de Galiza e do resto do Estado a sumarse a esta iniciativa co fin de protexer aos seus veciños e veciñas fronte a un goberno que parece non ter límites.