Burela, 12 de outubro de 2013. O equipo de goberno do Concello de Burela saíu ó paso das críticas do PSOE sobre a concesión de subvencións a colectivos no exercicio do presente ano 2013, aprobada no pleno do pasado xoves.
O equipo de goberno acusou ó PSOE de ser o culpable de eliminar as subvencións para colectivos en 2009, en 2010 e en 2011. Afirman que “os presupostos do PP de 2012 tampouco contemplaban subvencións, pero neste 2013 o esforzo de contención de gasto fai realidade a posibilidade de conceder subvencións. O bipartito burelés, de forma unilateral, eliminou as subvencións a colectivos, e tamén as axudas tristemente célebres dos corenta euros, pero deixaron con subvencións nominativas a través de convenios a só tres entidades: Burela Fútbol Sala, S. D. Burela e Club Baloncesto Burela”.
O grupo de goberno sinala que “como mostra da súa incoherencia, por ser suaves no trato, aquí están estes señores que agora piden a voz en grito que se concedan subvencións inmediatamente e xa o pediron no que vai de ano e en todo o 2012, cando foron eles os que as retiraron en 2009. Deberían ter algo máis de vergoña política e moderarse no que din, porque xa todo o mundo os coñece”.
O equipo de goberno asegura que “é certo que as subvencións que se dan este ano son de carácter nominativo, porque poñer en marcha un sistema de concurrencia competitiva sería prolongar demasiado a resolución do procedemento e o pagamento das subvencións; tal e como coma acontece na Deputación de Lugo, onde as subvencións por concurrencia competitiva se pagan para o ano seguinte. Pero resulta que o máis chocante é que a Deputación de Lugo, con un goberno bipartito, emprega o sistema de subvencións nominativas, e o curioso é que nese caso o PSOE non di nada. Polo tanto, temos que afirmar que os socialistas de Burela ou están na inopia ou nos queren facer tontos. Criticar que outros usen o mesmo sistema que eles empregan xa non é incoherencia, é outra cousa que require un tratamento específico”.
Desde o grupo de goberno burelés manifestan que “tamén é certo que quedan fóra algúns colectivos: o PSOE durante tres anos deixou fóra a todos os colectivos menos a tres. Pero a realidade é a que é: se non houbera que pagar un millón trescentos mil euros en facturas que nos atopamos nos queixóns, habería máis cartos para repartir. En 2014 xa se verá cal é o reparto. Non nos precipitemos”.
O equipo de goberno do Concello de Burela “respecta a calquera colectivo por moi pequeno que sexa polo que demostra de compromiso coa sociedade na que se inscribe; insistimos, respectamos a calquera colectivo, e sabemos distinguir, perfectamente, entre o colectivo e a persoa que o dirixe. O que non aceptamos é que desde un partido político se saia defendendo a uns e criticando a outros, o que demostra unha miopía política considerable. De todas formas, nós non vamos dar nomes; só dicir que non se cobra nada nin polo uso do pavillón dos institutos nin polo emprego das duchas do mesmo, e que o Concello abonou os custos do uso da explanada portuaria para certas actuacións. Igualmente, indicar que non houbo ningún trato despectivo cara ninguén. En todo caso, dicir que unha persoa quixo participar nunha reunión á que non estaba convocada, persoa á que se lle aclararon oportunamente as dúbidas que tiña”.
Para o goberno burelés resulta sorprendente ademais que agora se queixe o PSOE de que se da pouco ou non se da nada. E desde o equipo de goberno fan dúas preguntas: “¿Qué daba o bipartito burelés? Salvo ó Club Baloncesto Burela, nada ós demais que cita, nada. ¿Qué deu a Deputación Provincial de Lugo ó Club Ciclista Burela, por exemplo, en 2012 e 2013? Nada en 2012 e nada en 2013. E facémoslle un rogo ó PSOE burelés, que nos explique cales son os criterios que usa a Deputación Provincial de Lugo para conceder as subvencións nominativas e por qué lle dan un montón de cartos á Fundación Balogal, por exemplo, en detrimento doutros colectivos. ¿Non será que se dan cartos a algúns colectivos para a cambio contratar persoas afíns? Se isto é así, debería aclaralo o PSOE burelés, xa que o Sr. Llano é un flamante deputado-correo que cobra 51.000 euros anuais e ten a obriga de estar ben informado e de trasladar esa información ós cidadáns”.
O grupo de goberno lamenta profundamente “o carácter insultante, tabernario e intimidatorio que usa o PSOE burelés. Pero non insulta quen quere, se non quen pode, e non intimida quen quere, se non quen ten argumentos. Nin nun caso, nin no outro, nos preocupa o máis mínimo o que diga o PSOE burelés. En todo caso, ten o noso máis fondo desprezo”.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
