O Pleno de Riotorto acordou este luns instar a Feijóo a que non aplique o copago en Galiza

O Alcalde de Riotorto, o nacionalista Federico Xosé Gutiérrez Estoa, anunciou este luns que o Pleno deste Concello acordou instar ao Presidente da Xunta Galiza a que paralice a entrada en vigor da Resolución do 10 de setembro de 2013, da Dirección Xeral da Carteira Básica de Servizos do Sistema Nacional de Saúde e Farmacia, pola que se procede a modificar as condicións de financiamento de medicamentos incluídos na prestación farmacéutica do Sistema Nacional de Saúde mediante a asignación de achega do usuario. Asemade e na mesma liña acordouse Demandar do Goberno do Estado a derogación da resolución recollida no BOE do 10 de setembro que establece a obrigatoriedade da achega do usuario para as patoloxías e a carteira de medicamentos fixadas na referida resolución.

“Agardamos que a presión social obrigue ao PP a dar marcha atrás” afirmou Estoa posto que “a decisión do goberno significa cruzar todas as liñas vermellas xa que pretenden cobrar por medicamentos como Afinitor o el Tyverb utilizados para retrasar o cancro de mama, o Votrient ou Temodal utilizados para o tratamento do cancro de riñón e os tumores cerebrais respectivamente, a máis doutras medicacións como LCM prescritos para a leucemia mieloide crónica, o tratamento de tumores malignos non resecabeis e/ou metastásicos do estroma gastrointestinal (GIST), a artrite reumatoide, a dexeneración macular ou a hepatite c crónica. En definitiva estamos diante dun goberno sen alma que non coñece a palabra humanidade e que con decisións deste tipo non fai outra cousa que retratarse ou deixar claro que só goberna para os ricos. Tanto é así que segundo fixa o BOE a aportación do usuario para estes medicamentos que estaban exentos do copago será dun 10% do PVP, cun máximo actualmente fixado en 4,20 euros, conforme ao fixado na Resolución do 21 de Xaneiro da Dirección Xeral da Carteira Básica de servizos do Sistema Nacional de Saúde, o que significa que si o medicamento costa 30 euros a achega será de 3 euros, pero si o medicamento costa 100 euros a achega non poderá superar os 4,20 euros”.

O Alcalde de Riotorto sinalou que son tempos de loita e resulta necesario unha batalla social para facerlles fronte posto que a Xunta de Galiza pode paralizar a posta en marcha desta resolución do Ministerio de Sanidade se ben a decisión que anunciou estes días Feixó é de proceder a aplicar a medida en decembro. “ Sexa como sexa” indicou Estoa “ a nosa decisión é que ese 10% ate un máximo dun 4,20 por medicamentos que lle correspondería abonar aos particulares procedería a cubrilo ao Concello regulando os termos desa achega, que responde a vontade de seguir garantindo a universalidade da sanidade, mediante dunha ordenanza fiscal á que se poderán acoller todas aquelas persoas que leven residindo máis de seis meses en Riotorto. O Concello cubrirá a totalidade dos veciños con independencia da súa renda ou o prezo
da medicación poida quedar sen o seu tratamento. Gobernar significa optar na xestión dos fondos públicos priorizando as liñas de gasto, e entre a defensa dun servizo sanitario público e gratuíto e rozar unha camiño nos non temos ningunha dúbida.Non teño a máis mínima dúbida que o copago que pretende impor Feixó non é por razóns técnicas senón ideolóxicas”.

O Alcalde nacionalista reflexionou que “esta decisión non se xustifica mesmo desde a perspectiva do aforro para os orzamentos públicos, algo que recoñeceu o presidente da Xunta, o problema está en que o presidente da Xunta está nunha cruzada contra a sanidade pública e tanto lle ten que por razóns económicas unha persoa poida morrer. En definitiva este señor non ten corazón porque o corazón por algo está na esquerda. Agora ben decisións deste tipo tamén obrigan a redefinir as funcións prácticas e para o que estamos os Concellos, xa que en situacións como estas non somos quen de darlle resposta aos problemas reais dos nosos veciños que cada vez aparecen máis vinculados a decisión que sobardan o marco local efectivamente ai si é mellor marchar e fechar a porta da Casa consistorial. Non hai posibilidade de mellorar o presente, de dotar aos nosos veciños duns estándares mínimos de calidade de vida se non somos quen de enfrontar a axenda da Xunta que é a mesma que ao do capital. Nos non temos dúbida toca converter aos Concellos en autenticas trincheiras contra a ofensiva do capital e nese sentido agardamos que a esta medida que imos implementar se sumen o resto dos Concellos galegos. Efectivamente agora toca dar a batalla para parar esta decisión pero nun segundo momento debemos ser nos quen saiamos en rescate do pobo, porque isto non é máis que unha cuestión de vontade e de opción ideolóxica. E nos en Riotorto témolo claro porque facemos o que dicimos e dicimos o que facemos”.