Os deputados autonómicos do PSdeG-PSOE por Lugo fixeron este sábado unha primeira análise do Orzamento da Xunta para 2014, cos que, subliñaron,“a dereita de Feijóo agudiza o seu castigo á provincia, ó manter paralizados ou directamente eliminar os proxectos vitais para o seu progreso”. “Feijóo anunciou que estes serían os orzamentos menos restritivos dende que entrou na Xunta e que nos conducirían ó inicio da recuperación. Vistas as cifras reais, non podemos dicir máis que mentiu, pois, por moito que traten de maquillar e vestir os datos, para a provincia de Lugo son unha decepción e unha condena á parálise e ó retroceso”, asegurou a deputada socialistas no Parlamento Concepción Burgo.
A parlamentaria incidiu en que o Presidente da Xunta tivo hoxe unha boa ocasión para dar a cara e explicarlles ós lucenses “por que os deixa na estacada, negándolle oportunidades de desenvolvemento a unha provincia cun extraordinario potencial produtivo, sen ofrecerlle máis que resignación, autocomplacencia e desesperanza”.
Sen cartos para os servizos do HULA, nin para ampliar o hospital de Burela
A pesar das promesas do Goberno galego, o Orzamento de 2014 segue sen reservar cartos para dotar ó HULA de Radioterapia e Medicina Nuclear, pois, como explicou Concepción Burgo, “non aparece ningunha partida específica, nin sequera de investimentos en xeral para o hospital lucense, tampouco para os de Burela e Monforte. Na única consignación que poderían incluírse estes servizos é na denominada Diálogo Competitivo, pero os fondos previstos, de 2,6 millóns de euros, serían totalmente insuficientes para atender as necesidades dos outros hospitais galegos e a dotación de equipamento de Radioterapia e Medicina Nuclear no HULA”.
No caso da ampliación do Hospital da Costa, prometida por Feijóo ata en 6 ocasións dende que goberna e tralo anuncio da licitación dun Plan Director, o Orzamento volve a non contemplar especificamente investimentos para tal fin.
Desaparece o Museo da Romanización e a rehabilitación do cuartel de San Fernando
Por primeira vez, os presupostos da Xunta non recollen partida algunha para o proxecto do Museo da Romanización, nin tampouco para os traballos de rehabilitación do cuartel de San Fernando. Feijóo “ten abandonado por completo o patrimonio artístico de Lugo”, asegurou Burgo, pois tampouco figuran partidas “para manter a Muralla, Patrimonio da Humanidade”.
Freada para o auditorio de Lugo, o Plan Paradai e o acceso ó porto burelés
Aínda que a Consellería de Medio Ambiente asegurou nun comunicado este mesmo sábado que cos orzamentos de 2014 se lle daba “un impulso definitivo” ó auditorio de Lugo e ó Plan Paradai, “máis ben fan todo o contrario, certifican a freada ó que ten sometidos ambos proxectos”, indicou a deputada. Deste xeito, fronte ós 3 millóns de euros que a Consellería di que aumentou o presuposto para o auditorio, “a realidade é que só subiu en 700.000 euros, pois, nos orzamentos de 2013 tiñan pensado dedicarlle 7,4 millóns en 2014, e finalmente destinan 8,1”. A isto, súmaselle a drástica baixada que xa aplicaran este 2013, de 7 millóns de euros.
En canto ó Plan Paradai, “levan dous anos paralizándoo, pola súa falta de interese, a pesar de que traten, coma sempre, de buscar culpables fóra”. No orzamento de 2013, a Xunta prevía dedicarlle 3,2 millóns en 2014, e finalmente consigna 2,8, polo que a cantidade non é 7 veces maior, como di Medio Ambiente, senón só de 400.000 euros. En 2013 aplicaran unha rebaixa de 6 millóns de euros con respecto ó previsto.
No caso do porto de Burela, o proxecto leva paralizado dende que Feijóo está na Xunta, e sucéderonse os incumprimentos dos prazos anunciados. “A principios de 2011 dicían que as obras se retomarían no 2012, aínda que uns meses despois recoñeceron que non terían a consignación necesaria nos Orzamentos da Xunta dese exercicio, algo que tampouco ocorreu neste 2013. Agora, nestes presupostos prevén para 2014 unha partida de 800.000 euros, unha cantidade minúscula que certifica o parón desta infraestrutura fundamental para Burela”, subliñou o deputado mariñano José Ramón Val. A situación é “máis grave”, explicou, “tendo en conta que no Orzamento de 2013 prevían destinar 2 millóns de euros en 2014, que finalmente se quedaron, como podemos comprobar, en 800.000”.
Recorte para a conexión do porto seco e retraso das VAP da Mariña e Zona Sur
Para a execución da conexión do porto seco de Monforte desaparecen 3,5 millóns de euros, pois en 2013 a Xunta prevía consignar a esta infraestrutura 7 millóns de euros en 2014, e finalmente dedícalle 3,5, o que supoñerá un novo retraso. O deputado monfortino Vicente Docasar expresou ademais as súas dúbidas sobre “que porcentaxe do investimento prometido para 2013 –de 4,1 millóns de euros- foi realmente executado”.
Para a VAP Sarria-Monforte prevense 7,97 millóns de euros en 2014, que non compensan o recorte de 8,6 que o Goberno galego aplicou para este exercicio 2013. En canto a estes dous proxectos, Docasar destacou que a meirande parte dos fondos comprometidos son europeos, mentres que a Xunta achega “cantidades meramente simbólicas”. Ademais, engadiu, “a sensación que temos na comarca é que estas dúas obras tan necesarias vanse retrasado intencionadamente para rematalas en 2015, no entorno das municipais”.
No caso da VAP Costa Norte, o recorte “é brutal”, pois dos 7 millóns do pasado ano, a Xunta pasa a 1 millón en 2014, cando ademais as previsións de 2012 eran de 16,8 millóns en 2013 e 16,7 en 2014. Este descenso somete a “incerteza” a execución dunha estrada “fundamental para a vertebración das comunicación da Mariña”, afirmou José Ramón Val.
Baixo o título Memoria de mariñáns. Unha crónica da emigración da Mariña, o xornalista e investigador Martín Fernández Vizoso ofrecerá unha intervención centrada nas historias e vivencias dos emigrantes da comarca, ilustrando o fenómeno migratorio que marcou a vida de moitas familias ao longo do século XX. O evento inclúe tamén unha imaxe histórica de mariñáns retornados de América nos anos 30, que serve de fío visual para contextualizar esta realidade.
O prólogo é da profesora de Debuxo Camino Casabella Pumares, artista con raíces no Alfoz do Castrodouro, que participará na presentación xunto ao presidente do colectivo. Cinco dos pintores estarán presentes no acto, xa que Alaxe faleceu hai tres anos. A portada do caderno é obra do ilustrador Xosé Blanco. O evento celebrarase o sábado 8 de agosto ás 20:00 horas no castelo do Castrodouro, en Alfoz do Castrodouro.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
Xa se poden ver auténticas "artistadas", todas coas serea como protagonista, enchendo o ambiente desa creatividade tan propia da celebración.
O corte estará vixente entre as 00:00 e as 05:00 horas da madrugada do venres 7 ao sábado 8 de agosto, co obxectivo de garantir a seguridade das persoas asistentes e o correcto desenvolvemento do evento, que terá lugar nos Xardíns Noriega Varela. Desde o Concello de Viveiro solicítase a colaboración da veciñanza e das persoas condutoras, recomendando planificar os desprazamentos con antelación e utilizar itinerarios alternativos durante o tempo que permaneza vixente esta restrición.
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
