Os nacionalistas de Xove esixen, tamén, un compromiso da Xunta co Servizo de Axuda no Fogar de Xove

O portavoz do Grupo Municipal do BNG na corporación xovense, Marco López, felicitouse polas axudas que, ano tras ano, o departamento de Benestar Social da Deputación de Lugo vén destinando ao seu concello. Xove é o municipio que máis diñeiro percibe da Vicepresidencia da institución provincial para o Servizo de Axuda no Fogar, “o que demostra unha vez máis o firme compromiso do Bloque Nacionalista Galego cos servizos sociais”, afirmou Marco López. Estas axudas foron concedidas en base a criterios obxectivos nunha mesa técnica formada por funcionarios e representantes dos tres grupos políticos con representación na Deputación.

O voceiro nacionalista dixo non entender a actitude do goberno local, que critica as axudas achegadas desde o goberno do BNG e “aplaude a decisión do PP na Xunta de non dar nin un euro para este servizo fundamental”, sobre todo despois de que, un ano máis, o Goberno galego deixara á marxe do convenio de Servizos Sociais e Comunitarios á provincia de Lugo tras negarse a negociar a súa cofinanciación coa Deputación. Marco López preguntouse que é o que busca o PP de Xove con esa “actitude talibán” e incidiu na xestión transparente e participativa do Vicepresidente Antonio Veiga, que evita que o custo do servizo recaia nos usuarios e usuarias e mantén o emprego de ducias de persoas.

Por esta razón, dende o grupo municipal nacionalista anunciaron a presentación no pleno sinalado para hoxe, 7 de outubro, dunha moción esixindo da Xunta de Galiza o compromiso para asegurar a prestación do Servizo de Axuda no Fogar e o resto de servizos sociais básicos nos concellos de menos de 20.000 habitantes que, coma o de Xove, fican fóra das políticas sociais do goberno de Feijóo. Dende o BNG xovense aseguraron que pretenden “evitar esta clara inxustiza cos concellos pequenos” e, deste xeito, “minguar as repercusións negativas que as decisións políticas e interesadas do PP están a provocar en toda a cidadanía”.