Os socialistas galegos consideran “unha broma de mal gusto” que o PP rexeite unha proposta do PSdeG para impedir a competencia desleal do polbo de fóra de Galicia

Santiago de Compostela, 18 de outubro de 13. O portavoz de Pesca do Grupo Socialista, José Ramón Val, considerou “unha broma de mal gusto” que o PP rexeite unha proposición non de Lei para garantir que o polbo de fora de Galicia “cumpra con tódalas garantías e non supoña competencia desleal”. Así o dixo na Comisión de Pesca do Parlamento, celebrada este venres.

O deputado socialista reclamou “control sobre o produto foráneo” xa que “non é normal que habendo menos polbo o prezo medio baixe”. Lembrou así que mentres en 2011 2,6 toneladas de polbo produciran 15 millóns de euros, en 2012 1,8 toneladas produciron 10,4 millóns, 4,5 menos, e entre o 1 de xaneiro e o 16 de outubro de 2013, con 1,3 toneladas se acadaron tan só 6 millóns de euros, 4,46 menos.

Sinalou que os profesionais do mar denuncian a incidencia do produto foráneo sen control nos nosos mercados, o que provoca que a escaseza de polbo en lugar de provocar a suba dos prezos estea a provocar a súa caída.

Dixo que esta situación evidencia o fracaso do Plan de Xestión do Polbo do goberno galego, mentres moitas embarcacións tiveron que parar coa súa actividade na pesca desta especie e “dedicarse a outras, moitas veces mais perigosas”. Advertiu “improvisación” demostrada pola Xunta e apuntou á toma de decisións sobre a duración das vedas ou cambios nos períodos de recrutamento en función de informes científicos.

Finalmente, reclamoulle ao goberno galego que comece a traballar xunto co sector na redacción do Plan de xestión para o ano vindeiro “para que non volvan a darse as vergoñentas escenas do pasado”.

Marrocos
O deputado socialista explicou ademais o voto en contra a unha iniciativa do PP para acadar a ratificación do acordo de pesca asinado entre a Unión Europea e Marrocos por considerar que dito acordo resulta “claramente insuficiente” para a flota galega, beneficiando a Andalucía e Canarias.

Advertiu que este acordo suporá un custe de 40 millóns de euros ao ano beneficiando tan só a 5 licenzas de pesca de arrastre para armadores galegos, non dando acollida a 20 barcos cefalopodeiros ós que o goberno expulsou de Mauritania. Val dixo que si en lugar de asinar o acordo o custe fora repartido entre os mariñeiros suporía un salario de 4.000 euros ao mes para cada un deles.