O Concello de Burela acendeu este xoves o alumeado da urbanización de Torrentes

Burela, 14 de novembro de 2013. Esta tarde o Concello procedeu a acender o alumeado da urbanización de Torrentes e ultima algúns retoques para abrila ao tráfico o vindeiro sábado, 16 de novembro, tal e como estaba previsto. O equipo de goberno acudiu esta noitiña ata a devandita unidade de actuación.

O alcalde, José Mª González Barcia, explicou que “hoxe verificamos que o alumeado de Torrentes funciona perfectamente. Os aproximadamente 50 puntos de luz distribuídos por toda a unidade de actuación funcionan ben e o que fixemos hoxe foi definir aqueles puntos que se van manter acendidos de forma permanente, que van ser aqueles que están situados nas interseccións das rúas ou nos pasos de peóns e algúns máis que están nas rúas con traxectos máis longos para garantir a seguridade do tráfico rodado. Óptase por suprimir puntos de luz por unha razón obvia, porque hai moi pouca edificación en Torrentes e moi poucas casas habitadas. Polo tanto vaise reducir o alumeado ata aquilo que sexa permisible”.

O rexedor dixo que “as lámpadas que hai colocadas son de 150 vatios de potencia e chegado o momento haberá que pensar na reducción desa potencia para buscar un equilibrio económico sostible”.

González Barcia engadiu que “a unidade de actuación está xa lista, tan só faltan os últimos retoques para abrila o sábado, tal e como está previsto”.