O PP denuncia que “o Plan de Emprego de Gómez Besteiro exclúe a 43 dos 67 concellos da provincia”

Lugo 09 de novembro de 2013.- A voceira do Partido Popular na Deputación de Lugo, Elena Candia, acompañada de deputados provinciais, denunciaron este sábado en rolda de prensa que o plan de emprego promovido por José Ramón Gómez Besteiro e cuxas bases saíron publicadas hoxe no BOP, “impide que 43 dos 67 concellos que integran a provincia podan acceder a este plan”.

Elena Candia explicou que este plan exclúe aos municipios con máis de 5.000 habitantes ademais de todos aqueles concellos que entre os anos 2010 e 2013 fosen beneficiarios dun obradoiro de emprego. Unha situación, que segundo a popular, está a crear municipios de primeira e de segunda para José Ramón Gómez Besteiro; así como parados con máis ou menos dereitos en función da localidade de residencia

Os populares tacharon este plan de discriminatorio e explicaron que hai moitos concellos con máis de 5.000 habitantes cunha taxa de paro superior a municipios de menor poboación e a maiores exclúe a concellos que con poboación similar teñen maior número de parados.

Analizados os datos por poboación, Elena Candia censurou que máis do 85% dos lucenses non podan optar a participar neste plan, tanto é así que os 43 concellos excluídos suman unha poboación de 299.317 habitantes. A popular preguntouse se estes máis de 299.000 habitantes teñen menos dereito a un plan de emprego financiado con cartos públicos que os residentes dos restantes municipios que si poden participar.

Utilización dos parados con fins electoralistas

Unha vez analizados os prazos de selección e contratación dos traballadores, a voceira dos populares explicou que “sospeitosamente esta plan é coincidente coa época electoral, unha situación que se volve a repetir”. Un feito que, segundo Candia, demostra que a “José Ramón Gómez Besteiro só lle importan  os desempregados cando se aproximan as eleccións”.

Ademais, a análise deses tan só 24 concellos que poden acceder ao plan, evidencia que só 7 deles están gobernados polo Partido Popular, mentres que, polo tanto, os restantes (o 70,83% dos  concellos beneficiados) contan cun goberno do PSOE ou do BNG. Unha situación que amosa o desequilibrio deste plan e máis tendo en conta que o Partido Popular goberna nos 64% dos municipios.

Petición dun pleno extraordinario para corrixir o plan

Os populares solicitarán por escrito a celebración dun pleno extraordinario para que José Ramón Gómez Besteiro corrixa un plan “electoralista” que deixa fóra a 43 concellos da provincia.

A voceira do GPP explicou que o seu grupo lle solicita ao socialista que “pense menos no partido e máis nos lucenses e que a utilización do desemprego con fins electoralistas e pouco ético e non vamos a permitilo”.

José Ramón Gómez Besteiro deixou sen executar en 2012 uns 4,7 millóns de euros destinados á creación de emprego e a maiores converteu a Deputación de Lugo na única que non quixo asinar un programa en colaboración coa Xunta de Galicia e votou en contra da proposta do PP dirixida a creación dun plan consensuado cos municipios e cos sectores  máis representativos da provincia.

Os feitos evidencian que a Gómez Besteiro non lle preocupan os parados, senón os intereses partidistas, así o PP propuxo que un plan con menos duración, (neste caso 15 meses), chegaría ao dobre de xente. A maiores os populares pedíronlle ao socialista, “tan dado a facer comparacións”, que aprenda do Plan de Cooperación da Xunta que subvenciona a contratación de desempregados en todos os concellos da provincia, sen exclusión e en base a criterios obxectivos.

• Achégase cadro cos concellos excluídos