O PP de Mondoñedo e a alcaldesa de Lourenzá piden que se vale a estrada que transcorre á carón do embalse do Baos

A MARIÑA, 06 de decembro de 2013- A voceira do Partido Popular de Mondoñedo, Elena Candia, xunto coa alcaldesa de Lourenzá, Emma Álvarez Chao, urxiron este venres que a Deputación Provincial de Lugo vale a estrada que transcorre á carón do embalse do río Baos.

A popular Elena Candia explicou que é de imperiosa necesidade realizar este acometido dado a perigosidade que entraña que esta vía estea sen protección á altura do embalse, e máis tratándose dunha estrada con afluencia de tráfico ao permitir a comunicación entre a parroquia mindoniense de Santa María Maior e a laurentina de Santo Tomé.

Candia a maiores matizou que esta reivindicación provén dos veciños que alertaron deste risco e que, polo tanto, a través do Grupo Provincial do Partido Popular será trasladada á Deputación Provincial a través dun rogo na próxima sesión plenaria.

Esta situación de perigosidade estase a dar dende fai máis de tres anos despois de que o organismo provincial realizase acometidos na vía, deixando sen protección a estrada neste punto.

Os populares lembran que dende o Concello de Lourenzá xa se lle solicitará a Deputación de Lugo, en outubro de 2012 e mediante escrito, que levase a cabo a colocación de proteccións; sen obter resposta algunha ata o momento.

Polo tanto, tanto o PP de Mondoñedo como o goberno local de Lourenzá agardan que esta solicitude sexa atendida con urxencia polo organismo provincial que preside José Ramón Gómez Besteiro, dada a responsabilidade que se asenta sobre a Deputación ante posibles accidentes que podan darse no lugar polo feito de non ter valado este punto da estrada.