Os socialistas de Burela denuncian o cobro de taxas polo uso da Escola Municipal de Música de Burela

Dende o PSdeG-PSOE de Burela queremos denunciar un feito que nos parece moi grave, e que ven sendo tamén obxecto de denuncia por parte das usuarias e dos usuarios da Escola Municipal de Música de Burela nos derradeiros días. O asunto do que se está a falar é de irregularidades importantes nos cobros das taxas polo uso deste servizo, e que van dende os 3 ata os 60 euros nalgúns casos. O mencionado cobro produciuse o pasado 19 de novembro e, sen previo aviso (á hora de matricularse), segundo informan os usuarios, efectúanse, por parte do Concello unhas subidas que, neste momento, o único que fan é engadir unha dificultade máis para asumir pagos por parte das xa exprimidas familias.

Sabemos tamén, porque se fala na rúa, que a calidade do servizo da Escola de Música se viu empobrecida dende que o PP está a “desgobernar” Burela e gustaríanos que a máxima responsable da mesma, a Concelleira de Educación e Cultura, Mónica Pedre, dera por vez primeira a cara para explicar todos estes problemas. Sabemos que o Alcalde di que o servizo mellorou e que se contrataron tres profesores máis…, mais nós, dende o PSdeG-PSOE dicímoslle que, co bipartito gobernando, e con tres profesores menos, nunca deixamos de atender a ningún alumno ou alumna, e iso que tíñamos unha matrícula maior da que hai agora. Porén, a día de hoxe, algún alumnos e alumnas quéixanse de recibir menos horas de clase e, segundo se acaban de enterar sen previo aviso, agora teñen que pagar máis.

O tema parécenos moi grave e por iso, dende o PSdeG-PSOE de Burela, estudaremos a posibilidade de presentar unha moción sobre este tema no próximo Pleno Ordinario do Concello de Burela, se é que o Alcalde ten a ben convocalo algún día.