Armada: “Dános moita pena que o PSOE non se alegre dos importantes avances na Casa do Mar”

Cervo, 29 de xaneiro de 2014- A edil de Educación, Pilar Armada, lamenta “profundamente a incapacidade do grupo socialista para alegrarse polas boas novas que benefician aos veciños de Cervo”. Armada asegura que “nos dá moita pena que o PSOE non valore os importantes avances feitos na cesión da Casa do Mar”.

A responsable de Educación sente mágoa porque “nos catro anos de goberno do PSOE no Estado as nosas peticións nunca foran tramitadas”. Armada amosouse preocupada pola “falta de sensibilidade dos dirixentes socialistas, que deixaron gardados nun caixón cada un dos escritos que enviaba o Concello”.

Foi coa entrada do PP no Executivo central “cando por fin as nosas solicitudes foron atendidas”. De feito, Armada destaca que “dende entón, os trámites despegaron e estivéronse acelerando de tal forma que hoxe en día xa temos avanzado máis do 75% das xestións”. A edil lembra que incluso “temos documentos con Rexistro de Entrada que demostran os pasos dados e a implicación das diferentes administracións”.

“Para nós é moi triste que ao PSOE de Cervo non lle guste que informemos dos avances que imos dando coa Casa do Mar, porque consideramos que os veciños teñen dereito a saber en que paso dos trámites nos atopamos, especialmente tendo en conta que se trata dunha demanda de toda a sociedade cervense” explica. De feito, os pais e nais que reclaman o servizo do PAI na Casa do Mar “viron cos seus propios ollos todos os escritos que enviamos a Lugo, que nunca foron contestados e que nunca chegaron a Madrid, onde se tiñan que xestionar”.

“Gustaríanos moito que o PSOE fose capaz de alegrarse porque a Casa do Mar estea cada vez máis cerca de ser propiedade do Concello e que nos apoiase nuns trámites tan longos e complexos para camiñar todos xuntos no mesmo obxectivo: que todos os veciños e veciñas poidan aproveitar a Casa do Mar” remata Armada.