Cervo celebrará o Día dos Namorados cun concurso de declaracións de amor en Facebook

Cervo, 10 de febreiro de 2014- A Concellería de Xuventude, que dirixe Yolanda Pedreira, convoca o II Certame de cartas e poesías de amor na rede, que nesta edición titúlase “Un Facebook de Amor”. Para participar só é necesario escribir unha declaración de amor, orixinal e con sentimento, pensada para ser publicada nesta rede social. De feito, as palabras gañadoras faranse públicas a través da páxina de Facebook do Concello, ademais do resto de redes. As bases para participar poderanse recoller na Casa da Cultura a partir deste venres, día 14 de febreiro.

Este certame ponse en marcha por segunda vez no Concello de Cervo, aínda que é a primeira que se vincula coa rede social Facebook, xa que na anterior edición levaba por título “Amor en Twitter”. Naquel caso os requisitos da declaración seguían o límite de 140 caracteres como máximo imposto por esta rede.

Nesta ocasión, o espazo permite máis liberdade aos autores, podendo expresar os sentimentos á súa maneira, pero sen superar un folio en A4 de extensión. Os traballos poderanse presentar na Casa da Cultura ou no Concello ata o día 28 de febreiro, e o fallo do xurado darase a coñecer no mes de marzo.

Ao mesmo tempo, haberá premios en dúas categorías, de 14 a 17 anos; e de 18 en diante. Establécese un primeiro premio en cada categoría que consistirá nunha cea para dúas persoas nun local hostaleiro do municipio.