O BNG da Mariña chama a secundar a convocatoria de mobilizacións dos sindicatos sanitarios na defensa da sanidade pública o mércores 26 en Burela

A Mariña, 24 de marzo de 2014. O BNG apoia e asistirá ás mobilizacións previstas para o mércores 26 de marzo en trece comarcas galegas e no caso da Mariña na que dará comezo ás 20:30hrs. no Hospital da Costa. A fronte nacionalista ten claro que existen numerosas razóns para mobilizarse na defensa duns sistema pública de saúde atacada polo perfil ideolóxico do PP que pretende converter un sistema sanitario universal por outro discriminatorio entre quen poida pagala e a beneficencia.

Para o BNG o Partido Popular nos gobernos Galego e Estatal, están aproveitando a crise económica para aplicar sen compaixón o seu ideario político no conxunto dos servizos públicos, con especial énfase no ensino e na sanidade pública, para convertela nun negocio ao servizo de intereses económicos afíns ao propio Partido Popular que buscan novas oportunidades de negocio despois do estalido da burbulla inmobiliaria

Nesta liña executan políticas de degradación constante do sistema sanitario público colocando en situación vantaxosa o sistema privado, convidan á poboación que o poda asumir economicamente a subscribir pólizas sanitarias privadas ou mesmo entregan ao sistema privado servizos que deberan ser públicos e a construción de novos centros sanitarios.

Boa mostra do que está a suceder témola na nosa comarca onde se está a producir a degradación dos sistema público, tanto en centros de primaria como no Hospital da Costa, con profesionais que loitan diariamente por manter a calidade asistencial, mesmo loitando contra a dirección do SERGAS que aplica recortes orzamentarios, materiais e profesionais.

O BNG chama a manifestarse para reclamar con claridade e contundencia o fin destas políticas de demolición do sistema sanitario público, é evidente que o dirixentes comarcais do Partido Popular enganaron á poboación mariñá cun modelo de xestión integrada que lonxe de achegar como prometeron a sanidade ao usuario, afástaa obrigando a desprazamentos por servizos que antes se prestaban na comarca e agora en moitos casos acaban en clínicas privadas fora da comarca. As promesas sobre ampliación da carteira de servizos – servizo de oncoloxía – non se cumpren e a ampliación do Hospital da Costa segue o mesmo guión que as infraestruturas de estradas na comarca, unha luz ao final do camiño que nunca, nunca da chegado.