Cervo e Burela acollerán do 1 ó 4 de maio o XXII Congreso Internacional de Periodipesca

Burela, 29 de abril de 2014. Cervo e Burela acollerán o XXII Congreso Internacional de Periodipesca do 1 ao 4 de maio. Medio centenar de periodistas especializados en caza, pesca, natureza, turismo rural e de aventura realizarán visitas nos dous concellos para coñecer de preto os recursos turísticos cos que contan. Achegaranse en Burela á lonxa, ao barco museo Reina del Carmen ou ás redeiras e en Cervo visitarán Sargadelos e unha carpintería de ribeira.

Na presentación, que tivo lugar esta mañá, o rexedor burelés dixo que “estes profesionais debaterán sobre aspectos vinculados co turismo, coa pesca… e farán varias visitas tanto en Cervo como en Burela para coñecer a fondo os recursos turísticos cos que contamos os dous concellos. Hai visitas en Burela á lonxa, para que presencien in situ unha poxa de peixe, visita ao barco museo Reina del Carmen, ás redeiras, e en Cervo achegaranse ata Sargadelos e a unha carpintería de ribeira”.

O alcalde de Cervo, Alfonso Villares, sinalou que “deste xeito comprobarán en vivo e en directo a importancia dos recursos que temos nos dous municipios. O obxectivo último que perseguimos coa celebración deste congreso aquí é captar turismo e visitantes tanto para Burela como para Cervo e que iso se deixe sentir nos nosos sectores económicos”.

González Barcia lembrou que “xa en Fitur contactamos con responsables de Periodipesca para organizar este congreso aquí. Evidentemente traerá consigo un reforzamento do noso tecido socioeconómico e do que se trata, fundamentalmente, é de potenciar os nosos recursos turísticos en base a este grupo de periodistas que estarán aquí estes catro días, para que os espallen e os dean a coñecer e sexamos capaces de captar máis e mellor turismo en anos próximos”.

Os dous alcaldes lembraron que “Cervo e Burela están colaborando noutros ámbitos como o obradoiro de emprego, que acaba de rematar, a auga, a solicitude de subvencións para o aforro enerxético e agora ábresenos unha nova vía en materia turística que haberá que explorar e ver si terá continuidade”.

Alfonso Villares de José Mª González Barcia desexáronlles unha feliz estadía en ambos concellos.
No acto de presentación celebrado esta mañá tamén estiveron as concelleiras de Turismo de Cervo e de Burela, Begoña Alonso e Mónica Pedre, e representando a Periodispesca acudiron Luis Macías e Joaquín Formoso.