O BNG convida a rebelarse contra un modelo europeo “antisocial e antigalego”

A Mariña, 24 de abril de 2014. Militantes do BNG de Mondoñedo e Cervo convidaron hoxe á cidadanía a rebelarse contra un modelo económico imposto pola Troika e a UE que veta os principais sectores produtivos galegos e impón políticas de austeridade no económico e no social que multiplican o desemprego e expulsan á emigración a milleiros de galegas e galegos incapaces de atopar saídas laborais na súa propia terra. Os nacionalistas fixeron mención á complicidade dos gobernos galego e estatal con este modelo, “do que fan de obediente correa de transmisión”, e á inexistencia de políticas que poñan freo á liquidación de dereitos sociais e laborais e eviten a destrución do tecido económico galego que, no caso da Mariña, condenou á emigración a mais de 3.000 mozas e mozos da comarca nos últimos catro anos.

A fronte nacionalista fixo mención á parálise e desarticulación económica da comarca con empresas emblemáticas nos concellos de Mondoñedo e Cervo pechadas ou en situacións de quebra como son os casos de Aglomerados ECAR en Mondoñedo ou Cerámicas de Sargadelos en Cervo que levaron ao desemprego moita xente, na maioría dos casos sen posibilidade de recolocación, e sen que desde a administración galega se puxeran en marcha planos de acompañamento social ou política activas de emprego alternativas. O que está sucedendo na Mariña é unha sangría con empresas que noutros tempos foron fontes importantes fontes de emprego como as xa mencionadas ou outras como Gres Burela, Construcións Mon, etc. As políticas de austeridade impostas pola UE e cumpridas obedientemente polo Partido Popular agora, e antes polo PSOE no Estado, impiden a reactivación económica e asfixian á sociedade mediante unha presión fiscal inxusta que deixa ás grandes fortunas e grandes empresas exentas de co-responsabilidade fiscal.

O BNG fixo mención aos datos de emigración xuvenil, no que segundo o INE, mais de 3.000 persoas entre 16 e 34 anos son baixa nos padróns municipais nos últimos catro anos, moitas delas na busca de emprego. No caso de Mondoñedo entre 2009 e 2013, o padrón municipal sufriu un baixada na franxa de idade de entre 20 e 34 anos de 202 persoas mentres no mesmo periodo e idades Cervo perdeu 240 persoas.

O BNG lembrou que o nacionalismo galego sempre tivo unha posición crítica e consecuente con respecto á UE, en solitario en moitas ocasións e agora acompañado por outras formacións políticas “antes consentidoras dun modelo alleo ás necesidades da sociedade, antidemocrático e que despreza as capacidades de Galiza para producir e xerar riqueza e emprego”. Puxeron como exemplo que o BNG foi das poucas organizacións políticas que se opuxo ao tratado de Maastrich ou á constitución europea que despois acabaron tombando en referendo franceses e holandeses.

Neste contexto de crise, roubo e espolio, o camiño encetado polo BNG incide na capacidade real para decidirmos sobre o nos en función dos nosos intereses, por iso chamamos a rebelarnos e defender as conquistas sociais e o dereito a decidir para poder vivir dignamente do noso traballo na nosa propia terra.