González Barcia subliña a importancia do Encontro de Palilleiras para a promoción do concello no exterior

Burela, 9 de maio de 2014. A secretaria xeral de Igualdade, Susana López Abella, será a encargada de inaugurar este sábado ás 11:30 horas o encontro de palilleiras, que se celebrará en Burela. O alcalde, José Mª González Barcia, destaca a importancia que o evento ten para a promoción do concello no exterior.

O rexedor sinalou que “onte e hoxe tivemos a oportunidade de participar en debates sobre a problemática da pesca, tanto no presente como de cara ao futuro, e mañá máis de 500 palilleiras e encaixeiras vidas de todo Galicia e incluso de fóra da nosa comunidade autónoma van participar neste encontro que, por terceiro ano consecutivo, se celebra na nave de redes e se organiza de forma conxunta entre a Fundación Expomar e a asociación de mulleres encaixeiras e palilleiras de Burela”.

González Barcia dixo que “para nosoutros evidentemente é un motivo importante para estar apoiando a presenza de tantas persoas en Burela, porque iso axuda a dinamizar a economía local e, por outra parte, porque contribúe a promover o noso concello de cara a outros puntos da xeografía galega. Polo tanto, en primeiro lugar temos que agradecerlle e recoñecerlle o traballo á xunta directiva da asociación de mulleres encaixeiras polo ben que están facendo as cousas e evidentemente reiterar o noso compromiso, tanto dende a Fundación Expomar como dende o Concello, para colaborar con elas e para que este encontro siga celebrándose en próximos anos e, se cabe, aumentar a súa participación”.

O encontro de palilleiras de Burela será inaugurado mañá, sábado, ás 11:30 horas pola secretaria xeral de Igualdade da Xunta de Galicia, Susana López Abella: “creo que coa súa presenza aquí ratifica o apoio da administración autonómica, do goberno que preside Alberto Núñez Feijóo, a unha actividade como a do encaixe, que ten moita vinculación coa cultura mariñeira e que evidentemente nos últimos tempos se está espallando por toda Galicia con intensidade. Polo tanto vaia dende aquí tamén o noso recoñecemento e agradecemento á secretaria xeral de Igualdade, que representa á Xunta de Galicia, por vir a Burela apoiar unha iniciativa feita por mulleres, para mulleres e que o que pretende é, por unha parte, realizar unha actividade de ocio que consideramos positiva e, por outra parte, contribúe a promover o noso concello de forma importante de cara ao exterior”, manifestou o rexedor burelés.