Os socialistas de Burela denuncian “o cobro fraccionado do IBI que enmascara unha subida do 10%”

Dende o PSdeG-PSOE de Burela queremos denunciar unha práctica que o equipo de “desgoberno” do Partido Popular de Burela leva a cabo con todos os veciños e veciñas de Burela no cobro correspondente ó Imposto de Bens Inmobles (IBI).

Despois de que o equipo de “desgoberno” do Partido Popular de Burela anunciara a posibilidade de fraccionamento do IBI para os veciños e veciñas que así o solicitaran (como xa se viña facendo no goberno do Sr. Alfredo Llano), atopámonos coa sorpresa de que aplican este criterio para todos os veciños e veciñas en xeral, solicitaran ese fraccionamento ou non. O único fin que o equipo de “desgoberno” do Partido Popular é a de enmascarar a subida do 10% que lle volven a aplicar a este imposto, que dende o PSdeG-PSOE de Burela xa levamos criticado noutras ocasións.

Esta maneira de actuar é digna do máis afamado “trilero”, e o único que se busca con esta manobra é a de enganar os veciños e veciñas de Burela. Este equipo de “desgoberno” do Partido Popular de Burela engana e esconde as súas subidas de impostos ós veciños e veciñas de Burela da maneira máis desprezable e ridícula que se poida imaxinar, este equipo de “desgoberno” ten ós veciños e veciñas de Burela por parvos.

Dende o PSdeG-PSOE de Burela pedímoslle ó equipo de “desgoberno” do Partido Popular de Burela que lle explique os veciños e veciñas de Burela esta nova subida do 10% do IBI, e que non trate de enganalos. Cabe recordar que ese equipo de “desgoberno” leva subindo impostos dun xeito desproporcionado dende a súa chegada ó Concello e calquera que se queira parar a revisar os recibos poderán comprobar unha subida de ó redor do 40% dende que o Partido Popular se fixo coa alcaldía do Concello de Burela, ademais de subir absolutamente todos os impostos e taxas, chegando incluso a crear impostos novos.
Tamén lles recomendamos que revisen os recibos da auga que pagan e que van a pasar a pagar a partir do próximo recibo xa que tamén se levarán unha sorpresa en forma de nova subida.

Está máis que claro que este equipo de “desgoberno” vive fora da realidade que están a vivir os veciños e veciñas que están afogados e que non ven que se faga nada dende o Concello para aliviar a súa situación.