Arrinca en Cervo a temporada de baño co servizo de socorrismo nas praias e nas piscinas de Río Covo

Cervo, 4 de xullo de 2014- A temporada de baño arrinca esta fin de semana no municipio de Cervo coa entrada en funcionamento do servizo de socorrismo que se activará a partir do sábado nos principais areais e nas piscinas de Río Covo ata o 15 de setembro. No caso das praias, os vixilantes distribuiranse na do Torno, Cubelas e A Caosa, os areais de máis afluencia e que tradicionalmente veñen contando con este servizo.

O equipo de salvamento está formado por 10 socorristas, poñendo especial énfase no Torno, onde o dispositivo prevé cobertura na zona da ría, do porto e na praia, incrementándose a presenza de persoal neste areal. Ao mesmo tempo o equipo contará co apoio do Grupo de Emerxencias Supramunicipal e disporá de embarcación de rescate acuático e desfibrilador semiautomático centralizado na praia do Torno. O inicio da época de baño nas praias implica tamén que os areais se atopan xa totalmente acondicionados e equipados co mobiliario habitual.

Ao mesmo tempo, a piscina cuberta de Lieiro continuará aberta durante todo o mes de xullo, polo que o Concello seguirá mantendo o servizo de socorrismo nesta instalación, que neste caso conta con 5 vixilantes, aos que se sumarán os 10 socorristas que velarán pola seguridade dos usuarios das praias cervenses ata chegar ás 15 persoas dedicadas exclusivamente a tarefas de vixilancia e socorro. O persoal que estará pendente dos bañistas nos areais está financiado pola Xunta a través do Plan de Cooperación.

“Cervo está completamente preparado para iniciar a temporada estival, coas praias acondicionadas para acoller a cervenses, turistas e visitantes e, o máis importante, con persoal abondo para garantir a seguridade dos bañistas e evitar calquera incidente” explica o edil de Seguridade, José Ramón Soto. Pola súa banda a edil de Turismo, Begoña Alonso asegura que “las playas cervenses son uno de nuestros mayores atractivos, y cuidándolas y creando un clima de tranquilidad y seguridad pretendemos tamén apoyar al sector turístico, que en estos meses de verano vive un momento álgido en su actividad” remata a edil.